Gundogan-a'n Galatasaray a pan

Turkish champion Galatasaray-in an squad an thuam chhah zel a, Manchester City midfielder Ilkay Gundogan chu free transfer-in an la lut - kum hnih chhung atan contract a ziak.

Kum 34 mi midfielder hian Etihad Stadium-ah season khat dang khel turin contract a la nei a, mahse, City hian an captain hlui chungah zahngaihna lantirin, a thlawna chhuah an phalsak a ni.

Gundogan chuan, "Manchester City hian ka thinlungah hmun pawimawh an chang reng tawh dawn a ni. Hlawhtlinna duhawm tak tak kan chhar ho a, treble champion season-a captain ka ni theite kha ka inchhuang hle.

"Premier League leh FA Cup champion nih kha a ropui a, mahse, Istanbul khawpui ngeia, City tana a vawi khat nana Champions League nomawi chawi erawh ka thinlunga cham reng tur a ni," a ti.

Germany-a khawpui pakhat, Gelsenkirchen-a Turkish chhungkuaa seilian Gundogan hian kum 2016 khan Borussia Dortmund aṭangin City hi a pan a, Pep Guardiola-a'n Manchester khawpuia a lakluh hmasak ber a ni.

City tan season sarih khelin, kum 2023 khan Barcelona chu free transfer-in a zawm a, August 2024 khan City-ah vek hian a kir. EPL club tan hian EPL (5), FA Cup (2), League Cup (4), Community Shield (2) leh Champions League nomawi a chawi.

Gundogan chuan, "City hian hlawhtlinna an chang zel ang tih ka ring a, ka ram ngainat em em Turkey aṭangin ka lo thlir reng dawn a ni," a ti - City tan match 358-ah goal 65 khungin, assist vawi 47 a nei.

City director of football Hugo Viana chuan, "Ilkay Gundogan leh City hlawhtlinna hi thil kal dun tlat a ni a, he hmuna a sulhnu hi hriatreng a ni tawh ang," tiin an player ropui chu a thlah.