Inkhel hah loin Sabalenka a tlang

US Open champion lai Aryna Sabalenka chuan quarterfinal khelh hah ngai loin semifinal a lut, a khingpui tur Marketa Vondrousova chu khup hliam vangin a inhnukdawk a ni.

World number 1 Sabalenka hi Czech Republic nula Vondrousova nen hian intawng tur an ni a, mahse inkhel an ṭan hma darkar hnih pawh a awm tling tawh loah 2023 Wimbledon champion hi hliam vangin a inlan theih loh tur thu an ti chiang.

Belarus nula Sabalenka chuan, "Marketa ka tawrhpui khawp mai, a dinhmun ṭha zawkah ding mah ila hetianga tlang nih chu a nuam chuang lo, kan khingpuite an hliam hi chuan kan rilru a nghawng ve ṭhin.

"Player ṭha leh tawnhriat nei ṭha zinga mi a ni a, inkhel thei ni ila chuan mipui lam tan pawh en a manhla tham hle ang. Dam leh thuai turin ka duhsak a, a ṭhat leh vat pawh ka beisei," tiin a sawi.

Quarterfinal dangah Jessica Pegula erawh a chak - seeded palina Pegula hian Barbora Krejcikova chu 6-3, 6-3 a hnehin a thiam pali zinah a inhlangkai a, a hmachhawn leh tur chu Sabalenka a ni ang.

Kum 31 mi Pegula chuan, "Khawvela tennis stadium hmingthang leh lian berah kan inkhel a ni a, min entu tam tak hmaah hnehna ka chang, hetiang baka nuam leh hlimawm hi a awm thei tawh chuang lo ang," tiin a sawi.

Boruak fuh vak lo chungin Pegula hian New York khawpui a pan, tournament a khelh hnuhnung paliah vawi hnih chiah hnehna a chang. Mahse, atan Flushing Meadows chu hmun ṭha a ni chho mek a, champion thei dinhmunah a ding chho ta a ni - hmabak erawh a la nei.

Nizan khan Iga Swiatek leh Amanda Anisimova ten quarterfinal match an khel a, result kan hre hman lo.