Germany keeper no. 1 Baumann

Germany chuan World Cup qualifier-a an match hmasa berah zanin dar 12:15 hian Slovakia an hmachhawn dawn. Julian Nagelsmann-a hote hian September 7, Pathianni zan dar 12:15-ah Northern Ireland an hmachhawn leh dawn a, an group-ah hian Slovakia leh Northern Ireland bakah Luxembourg an awm tel bawk.

Germany no. 1 goalkepeer Manuel Neuer-a'n nikum August khan ram tana inkhelh a chawlhsan a, a aiawh tura ngaih Marc-André ter Stegen a inhliam bawk avangin rinrawl ber tur hriatthiam a har. Tun ṭumah hian Nagelsmann-a'n Oliver Baumann, Finn Dahmen leh Alexander Nubel te a ko a, Germany coach chuan Baumann hi bul ṭantu tur a nih thu a sawi.

Germany coach Nagelsmann chuan, "Goalkeeper ka neih danah ka lawm a, Marc-André ter Stegen dam ṭhat hma chu Oliver Baumann hi number 1 tur a ni ang. Hun rei tak chhung level sangah a khel tawh a, kan mit a tlung em em a ni," tiin a sawi. Hoffenheim goalkeeper Baumann hi kum 35 mi a ni tawh a, ram tan vawi li chauh la inlan mah se tawnhriat a nei ṭha tawh hle.

Germany hian striker langsar an kawl lo a, tun ṭumah hian West Ham striker Niclas Fullkrug leh Newcastle United lakluh thar Nick Woltemade te an ko a, Magpies striker hi a inlan a nih chuan en bik a hlawh ang.