Seville-ah Antony-a'n lawm a hlawh

Manchester United-in an chhawr duh loh Antony-a'n Real Betis a pan a, Brazilian forward hi pasalṭha angin Betis ṭantuten Seville-ah an lo lawm. Betis hian season liam taa loan hmanga an hawh Antony hi €25 mtd-in an lalut a, sell on clause ziak bawkin English club hian 50% an chang ang.

Real Betis-ah Antony hian jersey no. 7 a ha dawn a, kum 2030 thleng daih contract a ziak. Brazilian forward hian Betis tan match 26 khelin goal kua a khung bakah asssist vawi ruk a nei a, UEFA Europa Conference League-ah final a thlenpui.

Antony chuan, "Manchester-a thil thleng kha, keimah chiahin a hrehawmzia ka hria a, pawi ka ti takzet. Mahni chauhin kan training a, mah se kan tih tho a ngai si. Ka tan hun ṭha a thlen theih ka beisei a, tunah chuan hun harsa kha ka hnuchhawn thei tawh," tiin duh loh hrehawmzia a sawi chhuak. Ruben Amorim-a game plan-ah Antony hi a tel lo a, nipui bazar ṭantirh aṭanga lak chhuah theih ni mah se transfer tawp niah chauh a chhuak.

Real Betis erawhin Antony an dah sang thung a, Seville-ah mipui ṭhahnem takin lo hmuakin car aṭanga a chhuah dawn pawhin thawm a ṭha hle. Brazilian forward hi kum 25 mi a ni tawh a, Brazil tan match 16 khel tawhin Betis manager Manuel Pellegrini hnuaiah a career siam ṭhat a tum dawn a ni. Betis hian Man United midfielder hlui Sofyan Amrabat chu loan hmangin Fenerbahce aṭangin an lalut bawk.