Dele Alli-a'n club a nei lo

Tottenham Hotspur midfielder hlui Delle Alli chu a club khelhna Como nen inhriatthiam tawnnain contract an titawp a, club a nei lo.

Kumin January thla khan Dele Alli hian Italian club hi free transfer-in a zawm a, thla 18 daih contract a ziak. Como a zawm hma hian Alli hi inhliam bakah ruihhlo in a tihbuai avangin hun rei tak club a nei lo.

Mahse, Como-ah hian Alli hi vawi khat chiah a inlan a, kumin March thla khan bench aṭanga lutin minute 10 hnuah hnawhchhuah a ni. Cesc Fabregas-a'n season thara a ruahmannaah Alli hi a telh lo a, kum 29 mi lek niin a football career tawp thei dinhmunah a ding der a ni.