Sanga 'Saikhamakawn' hmaah Dinthar FC

GIG Motors MPL12-ah Saikhamakawnin chak hmel an la hmu lo a, chak châka tuihal Lalsangzuala Hmar enkawl team hian vawiin chhun dar 12:00 hian Dinthar FC an hmachhawn dawn. Maimawms hian an match hnuhnung berah an hmelma Chanmari an hneh lo a, Laldampuia kaihhruai team hi Saikhamakawn lakah thawhchhuah an tum ang.

I Day Football quarterfinal-ah Saikhamakawnin Dinthar 4-3 in an hneh a, mahse Maimawms hian champion ngei tum. MPL ṭan hmain R. Laldanmawia leh MS Dawngliana te an lalut tawh a, tunah Lalkhawpuimawia (Mapuia) leh Mumbai City midfielder hlui PC Rohlupuia an lalut.

I Day Football finalist

Saikhamakawn hian I Day Football-ah final thleng mah se MPL-ah beisei ang result an nei lo a, MPL-a nomawi chawi ngun ber coach Lalsangzuala Hmarin team a la rem fuh thei lo.

I Day Football-a player pawimawh Vanlalhruaia'n Ramhlun North a zawm san a, match hmasa berah hrem vangin club dan bawhchhia Lalnunzira Sailo an hrem a, an chhawr lo. MPL-ah mual sir aṭanga Saikhamakawn goal bawhna khawih danglam a ni a, match thum zawh hnuah a insiamrem ṭanah a ngaih theih.

Saikhamakawn hian match hmasa bera inhliam RS Lallawmzuala an chhawr leh thei tawh a, Aizawl FC lakah pawh point khat hlawh chhuak ringawt loin chak phu zawk an ni. Coach Sanga hote hian point thum hlawh chhuah ngei an tum dawn a, mah se an khingpui tur hi Dinthar a nih avangin a awlsam dawn lo.

Khawpui a ri dawn?

Saikhamakawnin Suanngaih-muana an kawl a, an intawn hmasak ṭumin Amuana'n hattrick a siam. Dinthar FC-in striker ṭha an mamawh tih an hria a, Kelkang striker Lalkhawpuimawia an lalut a, Mapuia ṭhatzia hrechiangtu chu Lalsangzuala Hmar a ni. Coach Sanga hian Mizoram team a hruai ṭumin Santosh Trophy qualifying round-ah Mapuia hi minute zawng zawng a khelhtir vek a, India ram pumah top scorer a ni hial.

Mapuia hi a hming chher ṭanna Dintharah a kir a, a chawmtu tur player an ṭhat bawk avangin a hlauhawm dawn. Maimawms hian East Bengal-a inzir chhuak PC-a an lalut tel a, Lunglei tlangval hi Indian Super League-a Mumbai City an champion ṭum khan a tel. Laldampuia hote hian intawn hmasak ṭumin chak lo mah se tun ṭumah erawh an buk a rit mah tawh zawk.

Dinthar hian an match hnuhnung berah Chanmari hneh lo mah se Danmawia leh Dawngtea te an la ṭha reng a, tlarhnung lamah Lalhmangaihsanga a rinawm viau bawk. Goalkeeper Joel B. Lalramchhana'n save ṭha a ngah a, mah se Mizoram senior team-a tel tur chuan tihsual a neih tlem a ngai - Chanmari laka an goal chhuahah mawh a phur tlat. Lunglei tlangval Ramchhana hian Saikhamakawn lakah insiamṭhat a tum ang.