Record duhawm lo siam thei SYS FC

GIG Motors MPL12-ah SYS FC-in point an la hmu lo a, match 11 khelh tur la awm mah se Lunglei club hi an insiamṭha a nih loh chuan record duhawm loh siam thei dinmunah an ding. SYS FC hian vawiin tlai dar 3:00 hian Mizoram Police an hmachhawn dawn a, hmabak erawh a hautak dawn.

Record chu

MPL hi season 11 khelh zawh tawh a ni a, season khata point hmu tlem ber chu Lunglei FC club niin MPL3-ah khan match 14-ah point li chauh an hmu. Season liam ta khan FC Bethlehemin point nga chauh an hmu bawk.

SYS hian match thum khelh tawhah point an hmu lo a ni ringawt lo a, I Day Football-ah pawh chak hmel an hmu lo. Lunglei club hian MPL club pahnih Mizoram Police leh Kanan FC te an hneh lo a, first division club Ramhlun North nen an inhnehtawk. Group khat aṭanga team khat chauh an tla chungin SYS FC hian first division club an tluk lo a, an tla.

MPL-ah SYS hian Chanmari FC, Aizawl FC leh Kanan FC te an hmachhawn tawh a, point an la hmu lo. Tun season-a MPL club an hmachhawn bik belhkhawm chuan match nga an khel tawh a, an la chak lo vek. Tun anga an kal reng chuan record ṭha lo siam thei an ni.

A êng zawngin

SYS FC hi Directorate of Sports & Youth Services hnuaia football academy an ni a, Lungleiah an innghat. Season liam ta khan MPL khel ṭanin point 16 hmuin parukna an ni a, chutihrualin pathumna Mizoram Police point thum chauhin an pha lo a, semifinal an lut teuh hle.

Coach Lalmuankima kaihhruai SYS hian player ṭha an chher chhuak ngei a, amaherawhchu MPL club dangin an chhuhsak avangin kuminah team thar an din. Chanmari FC tan Lalruatsanga, Joel Lalramengmawia, F. Malsawmtluanga, Mesak C. Lalrinngheta leh Joseph Laltluangpuia te an awm. MLS-ah Ngurthanmawia leh Ricky H. Vanlalhriatsanga te an nei a, Saikhamakawn-ah Jonathan Lallianchawia a awm bawk.

SYS hi la kim ta vek se chuan semifinal lut ngei tura ngaih an ni a, champion hial an beisei ngam ang. Chutihrualin player ṭha ṭhahnem tak an chan chungin SYS-in team ṭha tak an la din thei a, match thum an khelh tawha team hnih hi I League club an ni tih hriat a ṭha.

Season ṭantirhah naupang rual zingah tawnhriat nei HP Lalremruata leh T. Vanlalruata te an tel a, mahse midfielder pahnih hian club dang zawm an duh avangin Lunglei club hi an chhuahsan. Coach Muankima'n harsatna karah team thar a din a, Police lakah point hmuh ngei a tum ang.

Police nge nge

Mizoram Police-in I Day Football leh MPL-ah Aizawl FC 5-0 in an hneh lo ve ve a, an player lakluh tharten training an neih avangin an chhawr thei lo bawk. Mahse, Police hian an zia an chhuah a, Chanmari an chelh hnuah MLS FC an hneh.

Police-in ICU an chhuahsan leh tawh a, SYS FC lakah pawh chak ngei tura ngaih an ni. I Day Football-ah Police hian Lunglei club hi Lalbiakhlua (Biaktea) goal hmangin 1-0 in an hneh tawh a; R. Malsawmtluanga, F. Lalrinpuia leh Lalbiakhlua (Hlutea) te match hnuhnung bera an chet ṭhat avangin an tawh a khirh khawp ang.

Chutihrualin Police hian point li chauh an la hmu a, SYS hian hnehna an chang a nih erawh chuan point khat chauhin an inthlau dawn. Match khat lekah engkim a la danglam thei a, Lunglei club hi RG Stadium-a training an nih bawk avangin Police tan hna a awlsam lo ang.