Swiatek hneh lettu Anisimova
Wimbledon final an khelh ṭum khan Brilliant Anisimova hi Iga Swiatek lakah a mualpho, nomawi inchuhna inkhelah game la miah loin a tlawm a nih kha, thla hnih vel lek a liam hnuah erawh thawnthu a danglam ta.
US Open quarterfinal-ah an intawng zui leh a, champion tura rinkai zawk Swiatek lakah Amanda Anisimova hi 6-4, 6-3 in a chak ve ta zawk a, inkhel hmunawm bikah Anisimova a chungnung ta zawk - a chak dan hi set hloh lo chungin a ni a, a lawmawm zual ang.
Phuba a la
US Open khelh dan tur an pawh khan Anisimova chuan Swiatek nen an intawng leh thei dawn tih a hria a, quarterfinal an khelh hma khan Wimbledon final an khelh tawhna kha a enlet a, a tihsual lai a zir chiang.
Arthur Ashe Stadium khata pungkhawm mipuiten Anisimova an ṭan hle a, thawm pawh a ṭha. Seeded pariatna Anisimova chuan, "Rilru na leh zak taka ka awm tawhna kha ka en let a, chu chuan chona leh phurna nasa tak min siamsak.
"Tun hma deuh ang kha chu ni se la chuan, player ṭha lakah ka chak ve thei tih hi ka ring ngai lo ang, tunah erawh ka chak lohnate kha min tichaktu atan ka hmang thei ta zawk a, hmasawnna duhawm tak a ni," a ti.
Season hmang ṭha tak Swiatek tan tawpna duhawm lo a ni ve thung. Swiatek chuan, "Tournament chhung zawng khan ka service ṭha tawk lo, a tawpah ka tuar ta a ni. Ka chak lohna hi ka pawm a ngai," a ti a, insiamṭhat nghal ngei a tum.
Duhthusam
Nimin zing US Open quarterfinal inkhel dangah Naomi Osaka chuan Karolina Muchova chu 6-4, 7-6 (7-3) a hnehin semifinal a lut a, final lut tur chuan Swiatek hnehtu Amanda Anisimova a paltlang leh a ngai dawn tihna a ni.
Japanese star Oska hian Australian Open 2021 nomawi a lak hnuah, tun ṭum hi Grand Slam semifinal a luh leh theihna hmasa ber a ni hial, inelna sanga a thleng sang leh ta chu a tan duhthusam a ni chiang hle.
World number 1 hlui Osaka chuan, "Nu ka nih hnuah tun ṭum hi Grand Slam semifinal ka khelh lehna hmasa ber a ni dawn. Hmanni deuh kha chuan inkhel entu ka ni a, engtik niah emaw chuan ṭha takin ka la khel ve leh ang tiin duhthu ka sam ṭhin.
"Tunah chuan ka duhthusamte kha a takin a rawn thleng dik ve ta a, a tawp la thleng chiah lo mah ila ṭha taka ka inkhel leh thei ta hi ka tan chuan a hlu," a ti. New York khawpui hi tun hma aṭangin a tan hmun ṭha a ni.
