Forest an che maksak!

Premier League club Nottingham Forest chuan nipui transfer-a an club player man to ber ni tura an lakluh, winger Omari Hutchinson chu Europa League squad-ah an telh lo!

Kum 21 mi winger hian Ipswich Town aṭangin Forest hi pound maktaduai 37.5-in a pan a, an club player man to ber a ni chungin Europa League squad-ah erawh a tel lo lawi si!

Forest hian nipui transfer-a an lakluh zingah keeper Angus Gunn leh defender pathum Oleksandr Zinchenko, Jair Cunha & Cuiabano te pawh squad-ah hian an telh lo a, chhuak tur anga sawi Jota Silva leh Taiwo Awoniyi te pawh an tel lo.

Nottingham Forest hi dan ang chuan Europa Conference League khel tur an ni a, mahse, UEFA-in Lyon nen neitu thuhmun an nih avanga FA Cup champion Crystal Palace khelh a phal tak lohah chuan, ECL khel tur Forest zawk hi Europa League khel turin a ti.

ECL khel tur Palace squad-ah captain Marc Guehi a tel a, English defender hi transfer tawp ni khan Liverpool pan turin a inpeih vek tawh a, mahse, London club hian an chhuah phal leh lo - season khat chu a la khel dawn tihna a ni.

Europa League khel tur Aston Villa-in an squad-ah Ross Barkley an telh lo a, mahse, Manchester United pan ta lo keeper Emiliano Martinez an telh a, player thar Victor Lindelof, Harvey Elliott leh Jadon Sancho te pawh an tel.