Man United tan Man City an 'U' hret

Carabao Cup semifinal-ah Manchester City-in Old Trafford an luhchhuah a, mualneitu Manchester United 2-0 in an hneh. Pep Guardiola hote hian season li chhung a zawnin League Cup final an lut. January 6, Nilaini zan inkhelah hian Man City tan John Stones leh Fernandinho ten goal an khung a, an khelh dan thlirin chak an phu zawk. 

Man City hian final-ah Tottenham Hotspur an hmachhawn dawn. Club pahnih manager Pep leh Jose Mourinho te hi 2011 Copa del Rey hnua final-a an inhmachhawn leh hmasak ber tur a ni. An intawn hnuhnun ber hian Mourinho kaihhruai Real Madrid-in hnehna an chang a, Barcelona an treble champion loh phah.

League Cup hnuhnung pasarihah Man City vawi nga an champion a, nomawi an chawi loh ṭum hian Mourinho enkawl Chelsea leh Man United an champion. Manager aṭanga thlirin League Cup nomawi zawnna hi final duhthusam a tih theih ang.

Man United forward Marcus Rashford-a'n minute hnihna lekah goal-ah petin keeper Zack Steffen-a'n dang mah se a per chu City defender Ruben Dias-a'n an lamah a ti lut. Pep Guardiola hote an vannei a, Rashford a offside hman avangin pawm a ni lo.

Minute thum hnuah Phil Foden-a cross chu Ilkay Gundogan-a'n goal-ah a chantir ve nghal a, Man City goal pawh hi offside vangin pawm a ni bik lo. Goal chance hmuh tur a tam zui a, Bruno Fernandes-a ball pet chu keeper Steffen-a'n ṭha takin a dang.

Man City pawh goal hmaah an hlauhawm a, Kevin De Bruyne-a'n kawh zetin goal ban a pet per. Minute 24-naah Foden-a'n mual vei lam aṭanga la lutin United keeper Dean Henderson-a kap karah khung mah se English midfielder hi a offside avangin United an him.

Team pahnihin football hmuhnawm tak an lantir a, a hmawr bawkna a ṭha tawk lo. First half-ah goal hmuh tur a awm lo a, second half-ah a goal hma thung. Ṭum dang ang thoin Man United chu set piece-ah an chesual. 

Minute 50-naah Phil Foden-a freekick pet chu City defender Stones-a'n a su lut a, Man United tlarhnungten an tih tur an ti lo. Goal khat luh hnuah inkhel a la nung a, team pahnih tan ngaih ṭha taka awm theih a la ni lo.

Amaherawhchu minute 83-naah Aaron Wan-Bissaka ball tauh chhuah ṭha tawk loh chu Fernandinho-a'n mawi zetin box pawn aṭangin goal kilah a volley lut. United-in freekick leh corner kick aṭangin goal an chhuah a, set piece venhim kawngah hmasawn an mamawh hle.

Man City manager Pep Guardiola chuan, "Kan hlawhtlinnaah kan lawm a, hnehna kan chan hi Colin Bell leh an chhungkua bakah amah ngaitu Man City ṭantu zawng zawng tan kan hlan. England-ah club dang angin nomawi chawi tam lo mah se Bell hian he club tan hian nomawi awmzia hi a hriattir a ni," tiin club legend Colin Bell tan a hlan. 

Man City legend Bell hi Thawhlehni khan kum 74 mi niin a thi a, Bell-a ho hian Man City-in League Cup vawi hnih bakah FA Cup leh European Cup Winners Cup nomawi vawi khat ve ve an champion a ni.

Manchester United boss Ole Gunnar Solskjaer chuan, "Chak an phu zawk. Set play aṭanga goal hnih kan chhuah avangin kan lawm lo. Goal kan chhuah hnu khan ball chang tam zawk mah ila chance kan insiam thei lo," tiin team ṭha zawk an chak thu a sawi a, Edinson Cavani awm loh an tuar thu a sawi bawk.

League Cup semifinal-ah Bruno Fernandes a che ṭha lo a, Portuguese midfielder khelh fuh loh niah Paul Pogba a che ṭha lo. Solskjaer hote hian season liam ta khan semifinal pathum an khel a, an chak lo vek. Tun season-ah pawh a la danglam lo, season liam taa League Cup semifinal-a an hneh loh Man City lakah an tlawm nawn.

Man United hi Inrinni zan dar 1:30 hian Watford nen FA Cup third round-ah an inhmachhawn ang a, Man City hi Pathianni zanah Birmingham nen an inkhel ang. Solskjaer-a hote hian January 12, Thawhlehni zanah Burnley an tlawh ang a, point an hmuh chuan Premier League hmahruaitu ni chungin January 17, Pathianni zanah champion lai Liverpool khelmual Anfield an tlawh ang.