AC Milan an chak lo ve ta

Italian Serie A season kal laiah AC Milan chu a vawi khat nan an tlawm. Nilai zan inkhelah Milan hian an mikhual Juventus chu 3-1 in an ngam lo a, league nomawi inchuh boruak a ngaihnawm chho zel dawn.

Old Lady tan Federico Chiesa-a'n goal hnih a khung bakah Weston McKennie chuan goal khat a thawh ve bawk. Milan lamin ball an chan tlem an tuar a, chawlhlawk hma deuha Davide Calabria goal bak an neih belh thei lo.

Stefano Pioli naute chak lo mah se an elpui Inter Milan chu Sampdoria mualah 2-1 in an tlawm ve tho. Match 16 khelh chinah Milan hian point 37 hmuin hma an hruai chhunzawm, pahnihna Inter nen an inthlauhna chu point khat chauh a ni.

AC Milan lamin an thiampuipa Zlatan Ibrahimovic chu hliam vangin an chhawr thei lo. Swede striker bakah hian forward Ante Rebic leh midfielder Rade Krunic te chu coronavirus vangin an inkhel thei lo a, hrem vangin Sandro Tonali a inlan thei lo bawk.

Juventus tan Cristiano Ronaldo inlan thei mah se an ṭhat dan berin an khel thei bik lo. Juan Cuadrado leh Alex Sandro te hrileng vangin an inlan thei lo a, season duhawm hmangtu striker Alvaro Morata pawh hliam vangin an chhawr thei bik lo.

Player inlan thei lo tam mah se Old Lady lamin Ronaldo, Paulo Dybala leh Aaron Ramsey te an la nei tho a, an la ṭha tawk. Milan lam erawhin match dang ang bawkin thawhhona ṭha chu an hmachhuan a ni.

San Siro a inkhelah Chiesa-a'n minute 18-naah goal hmasa ber a khung. Italian winger hian mual ding lama a ball chan chu box chhung lamah a tlan luh pui a, forward Dybala-a'n a lo tawh persak zeuh chu laklawk nei miah loin a khung.

Serie A hmahruaitu Milan lamin inkhel an thunun let a, Rafael Leao leh Hakan Calhanoglu te goal khung tur chu keeper Wojciech Szczesny chuan ṭha takin a lo dansak, chawlhlawk hma chiahin defender Calabria chuan Szczesny dan hman loihin si phurh a sut.

Milan lamin hun ṭha nei zui mah se Diogo Dalot chuan Szczesny bawk a paltlang thei lo. Goal hmahruai khungtu Chiesa erawhin Dybala siamsak a hlah duh lo a, hun tawp dawnah Dejan Kulusevski thawhrah sengin American midfielder McKennie chuan an goal thumna a khung.

Milan manager Stefano Pioli chuan, "Kan khingpuite khan hnehna chan phu khawpa an khelh avangin kan zah tur a ni. Chutih rualin kan inkhel kha ngun taka en chuan lawmna tur a tam a, league nomawi chawi turin kan ṭha tawk tih pawh a lang," a ti.

Old Lady manager Andrea Pirlo chuan, "Tute nge kan hmachhawn tih hi a pawimawh ber lo, eng ang result nge kan neih tih hi a pawimawh lai chu a ni. Player ṭhenkhat khel thei lo mah se chhawr theihna awm ten an hna tlin takin an thawk," tiin a sawi.

Tun hnai season kua zet chu Turin club hian Serie A nomawi an chawi vek a, kuminah erawh an nomawi humhim tur chuan hna a hautak dawn. Hmahruaitu Milan an phak lohna chu point saih a ni, match khatin an khel tlem thung.

Nilaini zan khan AC Milan aiin Inter Milan an inkhel hmasa. Antonio Conte naute hian hnehna chang ni se la chuan hmahruaitu an ni dawn a, mahse Sampdoria mualah 2-1 a an tlawm avangin pahnihnaah an awm.

Sampdoria tan Antonio Candreva (23') leh Keita Balde (38') ten chawlhlawk hmain goal an khung, inkhel chawhnu lamah Inter lamin Stefan de Vrij hmain sut ṭhen mah se goal dang an sual chhuak thei tawh lo.

Inter manager Conte chuan, "Inkhel hriatthiam harsa tak a ni. Inkhel ṭhenkhatah chuan hnehna chan phu tak chunga chak lo zawk nih ṭum hi a awm," a ti. Goal an khung theih loh chhanah striker Romelu Lukaku inlan thei lo chu chhuanlam tur a nih loh thu a sawi bawk.