Kane & Son: Kawp tura khuanu duan sa?

"Tun season Premier League ti ngaihnawm ber pawl chu Harry Kane leh Son Heung-min an ni e," tiin sawi ila, sawi uar lutuk kan ni lo ang.  Premier League match 16 an khelh tawh hnua Spurs-in champion an la beisei ve ngam chhan lian tak chu player pahnih hi tih loh rual a ni lo a, an hmuhnawm takzet. 

He thu buatsaih laia an league match hnuhnung berah Spurs hian 3-0 in Leeds United an sawp a, player pahnih hian goal an khung - Son-a khung hi Kane-a siamsak a ni a, tun season-a league goal 13 an thawhchhuah dunna a ni chiah bawk. 

Kane & Son hian Premier League season khata goal thawk chhuak dun hnem (assist tawn) record an nih rual der a, league match 22 zet khelh tur an la nei - an record hi a nep lo hle. 

Player pahnihin Premier League-a goal 13 an thawhchhuah dun hnuhnung ber chu 1994-95 season daih kha a ni tawh a, Blackburn Rovers-in league nomawi an chawi ṭuma Chris Sutton leh Alan Shearer inkawp kha a ni. 

Sutton leh Shearer-te inkawp hmuhnawmzia leh ropuizia hre phak tan chuan Kane leh Son-a hnathawh dun hi sawi nep chi a ni lo - a ti hmasatu ten season tluana he record hi an siam laiin Kane & Son erawhin match 16 lekah an siam zui!

Tottenham boss Jose Mourinho chuan , "Ka ngaihdan chuan Premier League club tinah hian player ṭha tak tak an awm a, player ropui tak awm theih lohna anga ngaih club thlengin an awm. "Mahse, Sonny leh Harry-te hian tun season-ah thil danglam bik an ti tih erawh ka sawi a ṭul. Goal khung theihna hmuna an chet dan vel hi a inman em em a ni," a ti. 

Inngaizawng awm renga inrem nula leh tlangval an awm a, ṭhenkhat chu nupa tur renga duansa em ni chu aw, tih tur khawpa inrem an ni - Kane leh Son pawh khelmuala inkawp awm renga siam emaw tih mai an awl. 

Mahse, chutah chuan zawhna a lo piang - inngaihzawn leh nupa khawvelah chuan, "A chhan chu hmangaihna a ni," tiin a chhan theih a, khelmuala player inman bik erawh 'hmangaihna' nena sawi kawp a rem lo a, enge a chhan ni ang, tih chu zawhna awm reng a ni. 

Son chuan, "Hetiang taka inman tur hian theihtawp kan chhuah a, hun rei tak aṭang khan kan ti dun tawh - a chang chuan kan rilru hian kan inman sa a, a ṭhenah erawh kan sawi dun lawk ṭhin," a ti.

South Korean striker Son hian tun season league match 16-ah goal 12 khungin assist vawi nga a nei tawh a, inelna hrang hrangah match 25 khela goal 16 khungin assist vawi riat a nei - Kane hian league match 16-ah vek goal 10 khungin assist vawi 11 a nei bawk a, inelna hrang hrangah goal 17 (25 matches) neiin assist 14 a nei bawk. 

Kane-a'n Son tana assist a neih tawh zat hi pakua a ni - chumi awmzia chu tun season Premier League-a Kane-a assist neih zat 10 aṭangin goal khat chiah hi Son-a goal khung ni lo a ni. English striker Kane hian Son hi vawi khat lek pawh assist a nei leh a nih chuan Premier League season khata player pakhatin player dang pakhat tana assist a ngah ber record a ni nghal ang. 

Son hian  August 2015 khan pound maktaduai 22-in Spurs a zawm a, hetihlai hian Kane chu London club-ah hian a lo awm tawh sa. Player pahnihin Premier League an khelh dun hnua English top flight football-a goal an thawhchhuah tawh sa chu 32 a ni a, an chungah  Didier Drogba & Frank Lampard (36 goals) chiah anni aia goal thawk chhuak dun hnem an awm. 

Spurs forward chhuanvawr pahnihin goal an thawhchhuah tawh zat aṭanga tehin Chelsea legend-te pawh hi an khum ngei dawn niin a lang a, an hnuaiah hian Manchester City legend David Silva & Sergio Aguero (29 goals), Arsenal chhuanvawr Robert Pires & Thierry Henry  (29) leh Spurs player hmuhnawm ṭhin Darren Anderton & Teddy Sheringham (27)-te an awm!

Tun season-ah Son a hmuhnawm em avangin Harry Kane ai meuh pawhin a chanchinin sawi a hlawh zawk niin a lang a, a phu angin Kane hian fak a hlawh tawk lo - English striker hi football expert ṭhenkhat chuan Arsenal striker ropui ṭhin Thierry Henry nen an khaikhin hial tawh!

Manchester United legend Rio Ferdinand  chuan, "Kane hian Wayne Rooney min hriatchhuah tir ṭhin. Rooney khan hmun ruak zeuha luha, goal nawr kha nuam a ti ṭhin a, eng pawh a ti thei a ni ber ṭhin. Mahse, Kane-a hnathawh anga thawka, goal khung leh assist hna thawk kawp hnuhnung ber chu Henry kha a ni," a ti. 

Tottenham midfielder hlui Jermaine Jenas chuan, "Harry Kane-a ball pass thiamzia hi fak tlak a ni. A kum a tam telh telh a, a ropui zel a ni," tiin a club hlui player chu a fak a, Everton midfielder hlui Leon Osman chuan, "Kane-a tawlh hnung hret a, goal khung ai mahin assist chu hna berah a nei - a hnungah Son awmin team a pawt pharh a, hei hi an ṭhatpui em em a ni," tiin a sawi ve bawk. 

Manchester City defender hlui Micah Richards chuan, "A chang chuan Spurs hi Son leh Kane-ah an innghat mah mah niin ka hre ṭhin a, mahse, an khelh ṭhat ni chuan an hmuhnawm em em si. Kane hi number 9 ṭha ber pawl a ni a, Son lah a thiam em em bawk," tiin a fak ve thung.