India tan beisei tur a la awm

Khalid Jamil-a enkawlna hnuaia an tournament hmasa berah India-in beisei tur an la nei ve zel a, Ningani zan khan Afghanistan nen 0-0 in inhnehtawk mah se, CAFA Nations Cup-ah third place inchuhna inkhel an hmachhawn dawn.

Blue Tigers hian an match hmasa berah rin loh takin Tajikistan chu 2-1 in an hneh a, Iran (3-0) laka an tlawm hnuah Afghanistan hmachhawnin, goal an khung thei lo.

India-in knockout round lut chiang turin chak an mamawh a, mahse, inkhel ṭantir lamah Afghanistan an hlauhawm zawk - Khalid-a'n bench-ah Lallianzuala Chhangte a dah a, Hmingthanmawia Ralte chuan inkhel bul a ṭan thung.

Blue Tigers tan Irfan Yadwad chuan chance vawi hnih ngawt nei mah se, goal-ah a chantir thei lo a, Ashique Kuruniyan-a'n Afghan tlarhnung tihsual nangchingin, goal khungna remchang nei mah se, card hlawhchhuah nan chauh a hmang!

Chawlhlawk hman a nih hnuah India goal nawr a na lehzual sawt a, mahse, a vawi khat nana India tana inkhel bul ṭan Jithin MS vanneih zan a ni lo - minute 81-naah LZa luhtir a ni a, mahse, a ball cross ṭha zet chu Manvir Singh Jr-a'n goal-ah a chantir thei tlat lo.

Hun tawp thlengin goal dang a lut lo a, India an chak zo lo. Mahse, inkhel hnuhnung zawkah Iran leh Tajikistan te 2-2 in an inhnehtawk a, hei hian India tan kawng a hawng.

Iran hian point sarih hmuin group table chung ber an luah a, final an lut. Blue Tigers leh Tajikistan hian point li ve ve an nei a, head-to-head en a nih avangin, an lo intawn tawhnaa chak zawk India chu pahnihna an ni a, third place match an khel dawn ta zawk a ni.

Nizan khan group A lam an inkhel zo ve chauh a, India tan Thawhṭanni zana an hmachhawn tur a la chiang lo.