Sabalenka hmachhawn tur Anisimova

US Open hmeichhe single chu a hmawr an bawk dawn ta - zanin zanlai hian Aryna Sabalenka leh Amanda Anisimova ten nomawi an inchuh dawn, tournament khel ṭha tak pahnih an nih avangin final hmuhnawm a ni ang.

Sabalenka hi champion lai a ni a, world number 1 a nih bawk avangin a buk a rit dawn - Anisimova hi beisei phak baka khel ṭha a ni rih thung a, a tan Grand Slam title hmasa ber lak theihna remchang a ni dawn ve thung a ni.

Anisimova chu

Iga Swiatek nen an inkhelh dawn khan Anisimova hi chak lo zawk tura rin a ni - Wimbledon final an khelh ṭum khan game la miah loin a chak lo zawkah a ṭang, tunah erawh thawnthu a ziak danglam a, a chak zawk a ni.

Swiatek a paltlang hnuah US Open vawi hnih champion tawh, tun hnaia khel ṭha tak Naomi Osaka chu a hneh leh bawk. Osaka lakah Anisimova hian set a hloh hmasa, mahse darkar thum deuh thaw an inkhelh hnuin 6-7, (4/7), 7-6 (7/3), 6-3 in a chak.

Seeded pariatna Anisimova chuan, "Tun hi ka tawpna a nih loh ka beisei, a chhan chu final thleng tur hian kawng harsa leh hautak zet mai chu ka paltlang a, a hmawr bawkna pawh ṭha taka tih ka tum dawn a ni," tiin a sawi.

Semifinal an khelh hun hi US-ah chuan zanlai a ni a, tlai deuh tawh mah se New Jersey nula inkhel boruak a nung hle, a hmuna entu thawm a ṭha bawk, hnehna a chan hnuah pawh court-ah a ṭhingṭhi a, a tan chuan hun duhawm leh chhinchhiah tlak bik a ni.

Hmabak Sabalenka

Semifinal inkhel dangah Aryna Sabalenka chuan Jessica Pegula chu 4-6, 6-3, 6-4 in a hneh a, player pahnih an intawn vawi 18-na niin, Sabalenka hi vawi riat a chak tling ta chiah, an pahnih inkarah sulhnu a nei ṭha bik hle a ni.

Belarusian nula Sabalenka hian tun hnaiah chawlhkar 46 chhung chu a zawnin world number 1 dinhmun a luah, mahse season kal laiah Grand Slam title a la hlawh chhuak miah lo - tun hi a tan hun ṭha a ni dawn.

Kum 27 mi Sabalenka chuan, "Player ṭha leh beidawng duh miah lo ka hmachhawn a, thil a awlsam lo hle. A tawpah erawh harsa takin hnehna ka chang a, kum zawnin US Open final ka khel thei tur hi ka lawm.

"Season ka hmang ṭha hle tih a chianna chu ranking a ni a, chutihrualin Grand Slam nomawi tel lo chuan a famkim thei lo. Chuvangin, New York khawpuiah hian title humhim ngei tumin ka bei dawn a ni," tiin a sawi.