Chak phu SYS FC aia huai Police

GIG Motors MPL12-ah SYS FC-in Mizoram Police lakah chak phu khawpin khel ṭha mah se tawnhriat ngah leh player huaisen awm khawmna Police lakah goal an venghim thei lo a, 1-1 in an inhnehtawk. SYS tan Johny Lalmalsawmkima'n goal hmahruai a khung a, hun tawp hma hretin Lalhmunmawia (Ahmuntea) hmangin Police-in siphurh an sut.

Police-in hliam vangin MLS FC an hneh ṭuma che ṭha F. Lalrinpuia hliam vangin an chhawr thei lo a, MPL10 champion hi an squad chhah tawk lo mah se an player-te an upat tawh avangin starting XI an siksawi nasa. SYS erawh table mawngphaha awm an ni a, chak la nei lo mah se naupang tha za rual an ni thung.

Lunglei club-in Police lakah chak an inbeisei a, an inkhel a nung ṭha. Nimin inkhelah goalkeeper pahnih F. Lalmuanawma (Police) leh Lalmuanpuia Kawlni (SYS) te an che ṭha a, an dang ṭha ṭhin. Minute 38-naah R. Malsawmtluanga a chesual a, SYS midfielder Johny Lalmalsawmkima'n kawh zetin box pawn aṭangin a pet lut.

Second half-ah Police-in an zia an rawn chhuah a, player naupang lakah thapui rawn chhuahin an khel a rorum a, goal chance erawh an siam mai thei lo. SYS-in counter attack aṭangin chance ṭha an nei a, Stephen C. Malsawmtluanga'n goalkeeper chiah a hmachhawn tawhah goal ban a pet per. Amah thlawptu Stain Laltanfela pe se, goal ngei tura ngaih a ni a, a pek miau loh avangin SYS-in goal an khung belh lo.

SYS-in goal dang an khung belh theih loh avangin Police-in point hmuh an beisei a, a tawpah an nawr nat rah an seng. Goalkeepr che ṭha MP-a a tawpah a chesual a, Police defender Ahmuntea erawh a hna a hrechiang thung. Hualngohmun defender-in siphurh sutna goal a khung a, Police-in point khat hlu bik an hlawh chhuak.