Mizoram basketball team an vanduai

75th Junior Nationals Basketball Championship-ah Mizoramin September 4, Ningani khan match hnih an khel a, zing lamah Goa 84-68 in an hneh a, zan lamah Odisha 80-63 in an hneh leh bawk. Coach KC Lalliantluanga kaihhruai Mizoram hian match li khelin match thum chak mah se Gujarat 57-50 a an hneh loh avangin level 1 an kai zo ta lo.

Ludhiana, Punjab-a inelna neihah hian Mizoramin point sarih an hmu a, an group aṭanga tlang Gujarat pawhin point sarih tho an hmu a, goal difference-ah tluk mah se head to head-ah an pha lo. Mizoram coach KC-a chuan, "Kan naute an khel ṭha a, Gujarat laka kan khelh fuh loh kha a pawi ta a ni. Khami ni khan ruahsur vangin inkhelh an titlai a, minute hnih chauh warm up-na hun neiin ball feeling kan nei hman lo. Quarter hmasa pahnihah khan khel ṭha lo a, quarter tawp lama kan chet ṭhatin danglamna a siam lo," tiin a sawi a, vanneih ṭum ni se tuna an point hmuh ang zat chiaha an tlin theih thu a sawi tel bawk.

Mizoramin level 1 tling pha ta lo mah se losers knockout an khel zui ang. Inelnaah hian team telte hi group parukah ṭhen an ni a, group A leh B hi level 1 niin, group C-F te chu level 2 an ni. Group C-F aṭanga pahnihna leh pathumnaten loser knockout hi an khel dawn a, team riat telin vawiin ṭangin an khel ṭan ang.