Player 10 East Bengal-in Goa an chelh

East Bengal-in minute 56-naah red card vangin captain Danny Fox chan mah se an tlawm duh lo a, FC Goa  nen 1-1 in an inhnehtawk - Kolkata club tan striker thar Bright Enobakhare a ên chhunzawm zel a, Nigerian striker hian a club thar tan goal a khung leh ta. 

Kolkata club captain Fox-a'n ṭul lo takin FC Goa winger Alexander Jesuraj lakah red card a chawi a, inkhel dinhmun nena thlirin Goan club hi an chak ngei dawn niin a lang hman. 

Mahse, East Bengal tan goalkeeper Debjit Majumder a che ṭha takzet a, goal a chhuah duh lo - minute 79-naah East Bengal hian 'magic' an hmu ta nge nge a, Bright Enobakhare-a'n duhthala Goan player pali a bum thluk hnuah goal ṭha bik a khung. 

Nigeria Under 23 international hian East Bengal a pan hnuah match hnih chiah la khelin goal a khung ve ve tawh a, ISL-ah a cham chhunzawm a nih chuan Indian football-ah 'legend' anga hriat reng hlawh tur khawpin a thiam tawk. 

East Bengal hlim chhung erawh a rei lo - FC Goa-in player tam zawk nichunga tlawm an duh lo. Goal an chhuah aṭanga minute hnih liam hnu lawkah Devendra Murgaonkar hmangin si phurh an sut a, goal dang a lut tawh lo.