Spain an chak nuamsa

European champion Spain-in World Cup qualifier-a an match hmasa berah harsatna an tawk lo a, 3-0 in Bulgaria an sawp - La Roja tan Mikel Oyarzabal, Marc Cucurella leh Mikel Merino ten goal khat ṭheuh an khung a, Bulgaria-in a chhanletna tur an nei lo.

Spain hian group E-ah Trukey, Georgia leh Bulgaria an awmpui a, harsa lutuk loa World Cup 2026 inpetkai mai tura beisei an ni - chutihrual chuan Turkey hian an kawng dal an tum dawn.

Turkey hian an match hmasa berah hnehna chang ve thoin, Georgia chu 3-2 in an hneh. Turkey hi minute 71-naah Baris Yilmaz hnawhchhuah a nih avangin player 10-in hun tawp lam an khel hman a, mahse, goal thum an khung hman avangin an vannei.

Mikhual Turkey tan hian Mert Muldur chuan minute thumna lekah goal hmahruai khungin, Kerem Akturkoglu chuan goal hnih a thawh ve bawk a, nuamsaa chak tur angin an lang hman.

Mahse, Georgia tan Zuriko Davitashvili chuan si phurh sut ṭhenin, hun pek belhah Khvicha Kvaratskhelia chuan a khung ve leh a, mahse, Turkey erawh an lehthal thei ta chuang lo.

Pathianni zan dar 12:15-ah Turkey hian Spain an mikhual ve leh dawn a, inkhel en châkawm a ni.