Champion tur a la chiang lo - Piastri

Formula 1 driver championship hmahruaitu Oscar Piastri chuan nomawi chawi tur a la chiang lo tih a sawi, amah ang bawka McLaren car khalhtu Lando Norris nen chungnung zawk nih an la inchuh chho dawn a ni.

Pathianni zan dar 6:30 hian Autodromo Nazionale Monza-ah Italian Grand Prix an tlan dawn, champion tur tihchianna la ni chiah lo mah se Piastri hi a fal tawh avangin midang tan umphak a huphurhawm tawhin a rinawm.

Kum 24 Piastri chuan, "Hma ka hruaina hi point 34 chauh a la ni a, engkim mai hi a la danglam thei. Thil danglam hluai a thleng lo mai thei, chutihrualin kawng awlsam erawh a ni dawn lo tih chu ka chiang.

"Norris nen hian theihtawp kan chhuah a, chungnung zawk nih tumin inelna thianghlim kan lantir ṭhin bawk. Ka hmuh danah chuan champion tur sawina hun a la ni lo, hmabak kan la ngah em avangin a fimkhur thei ang bera ka chet a ngai," tiin a sawi.

Season hmasa khan McLaren hi team champion an ni a, tun hnaiah hma an sawn hle. Mahse, Lewis Hamilton (2008) hnuah driver champion an la nei leh miah lo, kuminah hian an driver pahnih zinga pakhat zawk chu a champion ngei a rinawm.