Thununna kan tuar a ni - Konsa

Aston Villa defender Ezri Konsa chuan sum leh paia thununna an tawh avangin an tan nipui bazarah chet a harsa tih a sawi a, an duh angin player an la lut ve thei lo niin a sawi bawk.

August tirah khan Villa hian Evann Guessand chu Nice aṭangin an la lut a, pound maktaduai 26 man niin pound maktaduai 4.3 a san belh thei tura tih a ni bawk.

An academy aṭanga inzir chhuak Jacob Ramsey chu Newcastle United-ah an hralh thung a, pound maktaduai 40-a an hralh avangin an sum dinhmun an siam ṭha deuh.

UEFA chuan July khan Villa hi an lo hrem tawh a, sum hman danah dan an bawhchhiat vang a ni. An club sum dinhmun a ṭhat leh phawt loh chuan player la lut thei lo tura tih an ni a, hei vang hian an duh angin an che thei lo.

Unai Emery hote hian, nipui bazar tawp niah Liverpool player Harvey Elliott leh Manchester United forward Jadon Sancho te chu loan hmangin an hawh ve leh thei chauh a ni.

Villa defender Konsa chuan, "Thil nihna leh a awmzia tak ka hrethiam lo, mahse pawn lam aṭanga ka hmuh dan chuan thil ṭha lo leh awmze nei lo tak niah ka ngai. Tun ṭuma bazar hun min hman tir dan hi chu kan tan thil ṭha lo tak a ni," tiin a sawi.

Season hmasa khan Aston Villa hi Premier League-ah parukna an ni a, Champions League khel turin an tling lo chiah - season hmasa lama an sum hman chhuah leh an lakluh a inbuktawk loh deuh avangin an duh angin kuminah an che thei lo.