Poch enkawl PSG chak zo lo

Mauricio Pochettino-a'n Paris St-Germain a enkawlna match hmasa berah hnehna a chanpui zo lo a, an mikhualna ramah Saint-Etienne nen 1-1 a inhnehtawkin point khatah an lungawi a ṭul.

Nilaini zan inkhel dangah Lyon chuan an mikhual Lens 3-2 in an hneh thung. Tun season Ligue 1 match 18 khelh tawh chinah Lyon-in point 39 hmuin hma an hruai a, an hnuaiah point 36 nei PSG leh Lille te an awm.

Thomas Tuchel thlaktu Poch-a'n hliam vangin Neymar a chhawr thei lo a, an tlarhma an hriam tawk lo. Mualneitu lamin minute 19-naah Romain Hamouma hmangin goal hmahruai an khung, an lawm chhung erawh a rei lo.

Goal hmasa luh aṭanga minute thum hnu lekah Moise Kean-a'n si phurh a sut. Everton aṭanga loan hmanga an hawh Italian striker Kean hian PSG tan goal 10 a khung tling der tawh a, a team chu point khat a hlawh chhuahpui.

French champion hian chakna goal khung theihna hun an nei, mahse Argentine winger Angel di Maria leh substitute Pablo Sarabia te khung tur chu goalkeeper Jessy Moulin-a'n a hming chher nan a hmansak a, a chhuah duh lo.

PSG manager Pochettino chuan, "Hnehna chan ngei kan tum a, point thum hmuh tumin theihtawp kan chhuah. A bik takin second half-ah khan hun ṭha pawh kan insiam hnem hle, mahse a pawimawh ber goal kan khung thei lo kha a pawi.

"Ni thum chauh kan la training ho hman a ni a, chuti chung chuan lawmna tur ka hmu. Team nghet taka din tur chuan hun a ngai rei ṭhin, tunah hian a bul kan ṭan chauh a ni," a ti. Captain Marquinhos pawhin an manager thar lakah rinna an nghah thu a sawi ve bawk.

Paris club hian season bul ṭan fuh tawk lo mah se Ligue 1 nomawi chu an humhim mai a rinawm. Club thuneitu lamin an duh chu Champions League a ni. Argentine manager kaihhruaina hnuaiah Barcelona an hmachhawn dawn a, hna a awlsam dawn lo.