Aizawl FC-in K. Hriata an la lut

I League club Aizawl FC-in MPL9 midfielder K. Vanlalhriatzuala an la lut a, vawiin tlai dar 3:00-a Kanan FC an hmachhawn hunah Khawlailung midfielder hi squad-ah a awm ang. GIG Motors MPL10-ah Aizawl FC-in season bul an ṭan ṭha a, match li khelh tawh aṭangin point 10 an hmu a, table chung berah an awm mek.

Coach R. Lalruatfela hnuaiah Aizawl FC-in khelh dan nghet an nei a, Kolasib tlangval hian player pawh a siksawi tam lo. AFC tan tlarhnungah Rohmingthanga a pawimawh a, midfield-ah Lalawmpuia Sailo a zalen a, tlarhmaah Zomuansanga a che ṭha bawk. Coach R-a'n K. Hriata a chhawrna tur hriatthiam a la har a, Khawlailung tlangval hi palian lo mah se a ball ken a nghet ṭhat avangin mual laiah leh sir lamah a ṭha ve ve.

MPL9-a Chawnpui a champion pui hnuin K. Hriata'n Delhi FC a zawm a, I League club-ah pawh hmun pawimawh a chang pha. Kanan lakah K. Hriata hian bul a ṭan loh pawhin bench aṭangin a lut ngei a rinawm. Aizawl FC striker C. Lalhriatpuia a dam tawh a, Farkawn tlangval hi MLS an hneh ṭumin a rawn inlan tawh. Amaherawhchu, Khawbel tlangval Zomuana a che ṭha a, C. Hriata pawh starting eleven chang chiang a ni rih lo.

Kanan FC-in an match hnuhnung berah Chanmari FC an hneh lo a, I League club Aizawl FC an hmachhawn lehnghal dawn. Chawngthansanga hote hian semifinal khelh an tum a nih chuan vawiina point hlawhchhuah a pawimawh.

Chanmari FC an hmachhawn ṭumin hliam leh damlohna avangin Kananin an ṭhat dan berin an inlan thei lo a, Aizawl FC lakah an ṭhat dan bera an inlan thei tawh tura ngaih a ni. Kanan tlarhmate hi Aizawl FC tlarhnung tan buaina tham an ni thei a, tlarhnung lam erawh match hnuhnung pathuma goal hnih vek an chhuah avangin insiamṭhat a ṭul hle.