Qatar lakah India U23 an vanduai

AFC Under-23 Asian Cup 2026 Qualifiers-ah India U23-te uiawm takin an tlawm a, inelna thlengtu Qatar chu 2-1 in an ngam lo - India tlawm mah se, referee thutluknaah sawisel tur tam tak a awm a, senior level-a ram pahnih inthlauhna thlir tel chuan Blue Colts result hi hnualna chi a ni lo.

Blue Tigers hian an match hmasa berah team ṭha zawk nia lang Bahrain chu 2-0 in an hneh a, an khel a hmuhnawm hle. He result avang hian Indian rawltharten inrintawkna an nei a, player ṭha bik Muhammed Suhail-a'n uiawm takin chance a hlah.

Qatar tan Mohamed Surag chuan chance hlauhawm tak nei ve leh mah se, India keeper Sahil a paltlang thei lo a, minute 18-naah Al Hashmi Mohialdin chuan hmahruaina goal a khung ta nge nge.

Mahse, India an beidawng duh lo - minute 52-naah si phurh sutna goal an khung a, Muhammed Suhail chuan a theihna pholangin India tan a khung a, 1-1 a ni.

Minute 67-naah beisei loh thil a thleng - India defender Pramveer chuan box chhungah Noureldin Ibrahim a titlu niin a lang a, Qatar player tlukna a nem hret niin lang mah se, referee-in penalty spot a kawk a, Pramveer a hnawt chhuak bawk!

Qatar captain Al Sharshani chuan penalty hi goal-ah a chantir a, India tan thawhleh ngaihna a awm tawh loh avangin an tlawm.

India tan Lalrinliana Hnamte leh Lalremtluanga Fanai te chuan inkhel bul an ṭan a, an khel ṭha dun hle. Terina chuan, "A uiawm duh takzet. Kan goal chhuah dan a ho hret bawk.

"Kan hmah Brunei an la awm a, kan sawp hrep chuan Asian Cup khel tura tlinna chance a la awm. Qatar (13-0) leh Bahrain (10-0) ten an sawp ve ve tawh a, kan sawp ve thei turah ka ngai," tiin Vanglaini a hrilh.

Qualifier-ah hian ram 44 inelin, group 11-ah team pali zel awmin ṭhen hran an ni. Group tina pakhatna chu Asian Cup khel turin an tling chiang ang a, pahnihna zinga a tiṭha zual palite an tling dawn bawk - India tan pahnihna tiṭha zual pali zinga tel chu beisei tur a ni ang.