Ronaldo-a'n a khung belh zel

Diogo Jota thih hnua Portugal-in match an khelh lehna hmasa berah Armenia 5-0 in an sawp a, Inrinni zan inkhelah hian Cristiano Ronaldo-a'n goal hnih a khung. Portugal captain hian ram tan goal 140 a khung tawh a, World Cup qualifying bikah goal 38 khungin a elpui Lionel Messi record (goal 36) a khum.

Ronaldo hian goal 38 khung turin match 48 chauh a mamawh a, Messi erawhin goal 36 khung turin match 72 a mamawh thung. Inter Miami forward hi qualifier match hnuhnung berah a inlan tawh dawn loh avangin Ronaldo record hi chu a khum tawh lo ang.

Goal khungtu ropui Ronaldo hian a career-ah goal 942 a khung tawh a, goal 1000 tling turin goal 58 chiah a mamawh tawh a, kum 40 mi ni tawh mah se tuna a goal khung dan thlir chuan thil theih a ni.

Portugal hian Armenia an sawp ṭum hian Ronaldo-a'n goal hnih a khung bakah Joao Felix-a'n goal hnih a khung a, Joao Cancelo-a'n goal khat khat a khung bawk. Europe aṭanga World Cup qualifier group F inkhel dangah Hungary leh Ireland te 1-1 in an inhnehtawk a, Portugal-in point thum hmuin hma an hruai. Group khat aṭangin a sang berin World Cup an khel ang a, pahnihnain playoff an khel thung ang.