Chhun dar 12:00-ah Chanmari FC Vs MLS FC

GIG Motors MPL12-ah Chanmari FC chuan vawiin chhun dar 12:00 hian MLS FC an hmachhawn dawn. Chanmari tan table chunglama dinhmun sawhnghehna hun ṭha a nih laiin Lawngtlai tan point hloh a thiang chuang lo.

MLS hian Saikhamakawn an hneh a, match dang pathumah an chak lo vek. Lawngtlai club hian Dinthar, Mizoram Police leh Aizawl FC te an hneh lo. Coach Vanlalpeka hoten an khingpui an hriat chian a ṭul a, Chanmari hi anmahni aia squad ṭha zawk an nih avangin tlarhnung tih phui ṭhat a pawimawh ang.

Lawngtlai club hian goal ruk an khung tawh a, player pahnih M. Lalpektluanga (goal 5) leh Falton (goal khat) te chauhin goal an khung. Chanmari laka goal khung turin M. Peka leh Falton-a te an pawimawh dawn.

Chanmari erawh squad a chhah ṭha a, position tinah a thlakna tur an nei vek. Tun dinhmunah Chanmari tan goal khungtu bik pawh an awm lo a, hei tak hi an buaina a ni zawk. Tlarhma lama awm Lalruatsanga leh PC Rosangzuala te aṭangin goal tam zawk khung an beisei ang.