Third division team-in Atletico pet chhuak

Atletico Madrid boss Diego Simeone-a'n  Copa del Rey second round-a third division club UE Cornella an hmachhawn hmain team tawhkhirh tak an tawn a rin thu a sawi a, a ring sual lo - Nilaini zan khan team pahnih hi an intawng ta ngei a, Cornella hian 1-0 in Atletico hi an pet chhuak!

Inkhela goal awmchhun hi minute sarihna leka Adrian Jimenez-a khung a ni a, Agustin Medina freekick aṭanga ball kal chu goal-ah a chantir - minute 63-naah Atletico defender Ricard Sanchez chu a yellow card pahnihna avangin hnawhchhuah zui a ni a, La Liga hmahruaitu hi an tho leh tawh lo. 

Diego Simeone-a tan chanchin lawmawm lo hlir hriat tur a awm a, defender Jose Gimenez chu minute 11-na lekah a ke rek hliam vangin lakchhuah a ngai - Atletico hi an ṭhat dan berin khel lo mah se bul ṭantu zingah Saul Niguez, Felipe, Ángel Correa leh Joao Félix-te ho an awm avangin chak loh hi an tan mualphona a ni. 

Atletico hnawtchhuaktu Cornella hi La Liga hmahruaitu an hmachhawn hma hian league match thum chhung chu a zawnin an tlawm a, an ngam loh zingah hian  Espanyol B leh Barcelona B team an tel - season hmasa khan third division club tho Cultural Leonesa chuan Atletico hi Copa del Rey aṭang hian an lo pet chhuak tawh!