TNT tel loin MVA season opening khel dawn

Mizoram Volleyball Association buatsaih - MVA Season Opening chu vawiin aṭang hian Tuikual Indoor Stadium-ah khelh ṭan a ni dawn a, team ṭha leh hlun Thutak Nunpuitu Team (TNT) chu an tel ve thei dawn lo.

TNT tan September hi an ṭawngṭai thla a ni a, hei vang hian inelna an hmachhawn thei dawn lo. TNT tel loin mipa inelna huangah Tuichangral, Hunthar, Sihphir, Khawbel, Chhinga Veng Spikers leh Anastasia Electric Veng te an inel dawn a ni.

TNT chuan thuchhuah siamin, "Thutak Nunpuitu Team (TNT) chuan September kan ṭawngṭai thla kan hmang mek a, vanduai thlak takin kan ṭawngṭai Thla' leh MVA Season Opening a in nang hlauh mai a.

"Kan ṭawngṭai thla hi til dang zawng zawng dah tha a Pathian lama kan insawrbing thla a nih avangin season calendar tlangzarh a nih rualin kan tel theih loh tur thu hi thlen nghal a ni a, a hnuah ziak a theh luh leh a ni.

"MVA hruaitute aṭangin ngenna a nasat em avangin ngaihtuah nawn leh a ni a. Thutak Nunpuitu Team hi Volleyball Team ni loin Rawngbawltu Team kan nih avangin kan rawngbawlna kan tlan chhiatsan ngam ta lo a ni.

"MVA hruaitute, Pro Club leh min tantute zawng zawng Pathian hming a min hrethiam hram turin kan ngen a che u," an ti.

Mipa team paruk hi pool A leh pool B-ah ṭhenhran an ni a, an inkhelh kual vek hnuah a sang pali ten semifinal an khel ang. Vawiin match hmasa berah Tuichangral leh Hunthar te an inhmachhawn dawn a ni.