World Cup hnaihtu England an ropui lo!

FIFA World Cup khel turin England-in kawng dik an zawh zel a, match li an khelh tawha vawi li an chakna ni turin Andorra chu 2-0 in an hneh - Thomas Tuchel kaihhruaina hnuaiah an la chak vek tihna a ni.

Three Lions tan hian Christian García leh Declan Rice ten goal khat ve ve an khung a, hun tawp thlenga goal dang lut tawh loin, 2-0 in England an chak.

Tuchel-a enkawl England hian group K-ah hma an hruai mek a, Andorra an mikhual hma hian Albania (2-0), Latvia (3-0) leh khualmualah Andorra (1-0) te an lo hneh tawh a, an group awmnaah team ṭha tia chhal tur an awm lo.

Hei vang hian England tan intihtheih viau chi a la ni rih lo a, match li an khelh tawhah match hmuhnawm tak hmuh tur a la awm rih lo bawk. Three Lions hian an group-a team ṭha bera chhal theih Serbia chu Thawhlehni zanah an lenchilh zui dawn a, an theihna tak tak hriatin a awm ang.

A har ka ti mange!

Villa Park-ah England-in Andorra an mikhual a, bul ṭantu zingah khawvel ang pawha striker ṭha ber pawl Harry Kane, midfielder Declan Rice leh Barcelona forward Marcus Rashford te an awm chungin, inkhel hmuhnawm an pho chhuak thei lo.

FIFA ranking-a 174-na Andorra an ṭang thei fu a, 5-4-1 hmanga tlarhnung lama an inrem tlat avangin Three Lions-in paltlang an harsat. Mahse, minute 25-naah England an vannei.

Arsenal forward Noni Madueke-a cross chu Andorra defender Christian Garcia chuan anmahni lamah tilutin, England hi goal a 'khilai' a, mikhual team an hawihai.

Mahse, Andorra-in anmahni aiin England an ṭha zawk tih an chiang a, si phurh sut tuma nawr let ai chuan goal venhim a, mualpho taka haw loh dan an ngaihtuah a, goal an ven chhunzawm.

Hello Rice

Nottingham Forest midfielder Elliot Anderson chuan England tana a match hmasa ber khelin, ram tana a inlan hmasak berah bul a ṭan nghal a, khel hmuhnawm lo tak England team-a hmuhnawm awmchhun a ni.

Mahse, Anderson hian ram tana a match hmasa bera goal khung nghal theihna remchang a neih chu a chhawr bik lo a, Andorra keeper, Spanish second division club Córdoba tana khel Alvarez chuan ṭha zetin a dansak.

Minute 67-naah England vanneihna a her chhuak nawn a, Reece James-a cross aṭanga a ball hmuh ṭha zet chu Rice chuan an hmahruaina belhchhahna ni turin goal-ah a chantir.

Andorra tan Villa Park-ah si phurh sut ngaihna a awm lo a, England an chak. Mahse, fan-ten hei aia game hmuhnawm zawk an beisei a, World Cup nomawi beiseina nei turin Three Lions tan hmasawn a ṭul tih a lang.