Messi a la danglam lo!

Lionel Messi-a'n a hna ngai a thawk leh ta - Nilaini zan khan La Liga match-ah goal hnih a khung a, Barcelona chu Athletic Bilbao lakah 3-2 in hnehna a chanpui. 

Bilbao hian minute thumna leka Inaki Williams goal hmangin hma an hruai a, mahse, Catalan club hian Pedri leh Messi hmangin an chhanglet - Bilbao tan Iker Muniain-a'n goal khat khung ve leh mah se awmzia a nei lo. 

Barcelona-in hnehna an chan avangin table-ah pathumnaah an invawrh chho a, hmahruaitu  Atletico Madrid chu point sarih chiahin an thlau ta - match hnihin an khel tam zawk tih erawh hriat tel a ṭha. 

Zanin dar 1:30-ah Villarreal chuan Celta Vigo an lenchilh dawn a, table-a pangana ni mek team hian hnehna an chang a nih chuan Barca leh palina Real Sociedad an lehpel ang. 

Athletic tan Inaki Williams chuan minute thumnaah goal hmahruai a rawn khung a, tun hnaia result nei ṭha thei lo Barca fan-ten hlauhthawnna nen an team inkhel lai an thlir. 

Mahse, mualneitu Athletic hlim chhung a rei lo - minute 14-na lekah rawlthar duhawm Pedri chuan si phurh sutna goal a tauh lut a, Barca an nung thar sawt.

Messi-a'n goal khung dan a la theihnghilh lo tih pholan chhunzawmin goal hnih a rawn khung ve leh a, chak tur a chiang tawh. 

Minute 90-naah Iker Muniain chuan Athletic tan khung ve leh mah se a team beng harh tur erawhin a tlai tawh a, Barcelona-in an phu ang ngeiin hnehna an chang. 

Nipui transfer-a a thlawna chhuak thei Messi-a'n kum 33 ni tawh mah se a la chuai ve lo tih a pholang a, goal hnih a khung bakah hian vawi hnih ngawt post a tih per.

Hei mai a ni lo - Pedri goal khung kha Messi ke aṭanga chhuak a ni a, Messi goal hmasa zawk hi Pedri nen an in 'one-two' hnua lut a ni a, a goal hnihna hi Antoine Griezmann-a siamsak a ni. 

Argentine forward hian tun season inelna hrang hrangah match 20 khelin goal 12 a khung tawh a, assist vawi ruk a nei bawk - a season hman ṭhat loh ṭum anga an sawi season-a a statistic hi world class striker tam tak tan inchhuanna tham a tling. 

Messi hi Iago Aspas, Gerard Moreno leh Luis Suarez-te nen league-ah goal kua khungin top scorer an ni mek - hriat tel tur chu Messi hian tun hma angin goal khung hi hna berah a nei tawh lo a, a ṭhiante tana siamsaktu hna a thawk tel tawh. 

Athletic Bilbao laka Messi khelh dan enin amah rimtu Paris Saint-Germain leh Manchester City tan chuan chil ti put khawpa player ṭha a la ni reng tih a lang a, Barca hian an ropuina hloh tawh neih let leh an duh chuan Messi chelh dan an ngaihtuah a ṭul ang. 

Kar hmasa Pathianni khan Athletic Bilbao hian league match-ah Elche chu 1-0 in hneh mah se an coach Gaizka Garitano an ban zui a, Valencia coach hming ṭha ṭhin Marcelino an lalut. 

Mahse, coach thar enkawlna hnuaia an match hmasa berah bul ṭan ṭha viau mah se Bilbao-in Messi an ngam lo a, club thuneituten Garitano an ban fuh leh fuh lohah inhnialna an ṭan derin a rinawm. 

Barcelona hian December 8 khan Champions League-ah 3-0 ngawtin Juventus an ngam lo a, mahse, hemi hnu hian league match sarih chhung an tlawm tawh lo. Vawi nga an chak a, vawi hnih an draw - an draw result pahnih avangin sawisel tawk mahse, a zawna league match hnih an chak leh tak avangin champion an sawi ri ve leh tawh ang.