Bengaluru-in an coach an ban

Mumbai City laka 3-1 an mualpho hnu lawkah Bengaluru-in thutlukna langsar tak an siam a, coach Carles Cuadrat an ban - assistant coach Naushad Moosa chuan Bangalore club enkawl hna a thawk chhunzawm ang.

Bengaluru hian tun season-a league match kua an khelh tawhah vawi thum chiah chak an la nei a, vawi thum an khingpui inhnehtawkpuiin vawi thum chu a tlawm zawkah an ṭang a ni. 

Kum 52 mi Cuadrat enkawlna hnuaiah Bengaluru hian  2018-19 season khan ISL table chung ber luah chungin league round an khar a, final-ah hnehna changin an champion zui. 

Hei mai hi a ni lo - ISL-a chak zawn rei ber (6), tlawm nei lo rei ber (11) leh clean sheet rei ber (11) record-te chu Cuadrat ho hian an siam a ni. 

Bengaluru director Parth Jindal chuan, "Uluk taka ngaihtuahna kan sen ho hnuah, kawng thar zawh tura insiamrem a ṭulin kan hria a ni," a ti a,  "Carles hoa kan hlawhtlinnate kha kan chhuan em em rualin, tun season-ah kawng kan bo ta deuhin kan hria a, he thutlukna hi siam a ṭul ta a ni," a ti zui.

Indian football-a club inrelbawlna fel ber pawl Bengaluru hian Cuadrat nena an inṭhenna hi 'inhriatthiam tawnna' tiin sawi mawi mah se tun hnaia an result leh club Director ṭawngkam aṭangin an 'inban' ngei niin a lang.