Chanmariin MLS FC an hneh

GIG Motors MPL12-ah Lawngtlai club MLS FC-in Chanmari FC chelh tumin theihtawp mah se I League club 3-1 in an chak. Chanmari tan Aron Vanlalrinchhana, Michael Lalbiaksanga leh Lalruatsanga ten goal khat ṭheuh an khung a, MLS tana Ngurthanmawia goal khung chu scorline timawitu chauh a ni.

Rochhingpuia hoten team ṭha zawk an ni tih an lantir a, inkhel an thunun bakah goal chance pawh an ngah zawk. I League club-in goal an khung hmasa ngei a, Aron Vanlalrinchhana'n box pawn aṭangin minute 21-naah a pet lut. Cherhlun tlangval Aron-a theihna san vanga lut a ni.

MLS pawhin goal chance an nei a, Lalremmuana'n hnai tak aṭangin freekick a khung lo. Dinglam aṭanga Ricky H. Vanlalhriatsanga cross ṭha pawh Chanmari defender Malsawmsanga Renthleiin a tauh chhuak ṭha hle.

Second half-ah Chanmari bawkin bul an ṭan ṭha a, Lalrinchhana Tochhawng tauh chu MLS keeper Rosangliana'n a dang ṭha hle. Mahse, M. Peka ball pass sual vangin PC Rosangzuala'n lain Hnathial tlangval hian Michael-a a pe. Tlangmawi tlangval hian yard 35 vel aṭangin kawh zetin minute 72-naah a khung.

Chanmariin injury time-ah corner kick hmang ṭangkaiin Lalruatsanga'n goal thumna a khung a, goal khat luh theih nan captain Rinchhana a thawk ṭha hle. I League club 3-0 a an chak mai dawna a lan laiin MLS-in hun tawp hamrik hma hretin an khung a, Falton-a ball pass chu Ngura'n a khung. Lawngtlai club-in Chanmariin tlarhnung an ṭhiat mawi a, siphurh sut nan erawh a tlai ta hret.

Chanmari FC-in match nga an khelh tawh aṭangin point 13 an hlawh chhuak. Lawngtlai club erawh vawi li an chak tawh lo a, point thum chauh an la hmu thung. Round 6-ah I League club pahnih an inkhel dawn a; September 11, Ningani chhun dar 12:00-ah Aizawl FC leh Chanmari ten league hmahruaitu an zawng ang.