A chung berah Aizawl FC

GIG Motors MPL12-ah Aizawl FC-in hmahruaitu ni chhunzawm turin nimin tlai khan Kanan FC 2-0 in an hneh. I League club tan Zomuansanga leh Vincent Lalduhawma ten goal an khung.

RG Stadium-ah Chanmariin chhun lamah MLS FC an hneh avangin hmahruaitu an ni zawk a, Aizawl FC-in pahnihna awm an duh lo a, Kanan hnehin pakhatna dinhmun an rawn luah lehnghal.

I League club tan Khawbel tlangval Zomuana'n minute -na lekah mawi zetin Kanan keeper H. Vanlalduhsaka a pet khum. Aizawl FC striker hian match nga lekah goal sarih a khung der a, ball petu Vincent-a a fakawm hle.

Aizawl FC-in goal an khung hma a, Kanan goal bawh a nat tawk loh bawk avangin inkhel a hmuhnawm tawk lo. Chutihrualin second half-ah Kanan tan Lalthanpuia (Tepuia) chance ṭha a rawn hlah a, Mamit tlangval hi an thlak hnuah Aizawl FC tlarhnung an hahdam sawt.

I League club-in K. Vanlalhriatzuala, C. Lalhriatpuia leh Sawma Tlangte te bench aṭangin an luhtir a, Lunglei Zobawk tlangval Sawma Tlangte a nung ṭha. Minute 86-naah Sawma cross ṭha chu Vincent-a'n a khung a, Aizawl FC 2-0 in an chak.