Brazil kuta awm Bolivia

South America ram aṭanga World Cup khel thei tur team paruk an chiang tawh a, playoff khel tur pakhat a la chiang lo - Nilaini zing hian pasarihna dinhmun tihchian a ni dawn a, ram pahnih Venezuela leh Bolivia ten beisei an la nei.

Venezuela hian naktuk zing dar 5:00-ah Colombia an mikhual dawn, an chak a nih chuan midang result ngaihchan tel ngai loin inter-confederation playoff khel turin an tling nghal ang, an kutah engkim a awm.

Bolivia pawhin beisei an la nei, mahse pariatna ni mek Bolivia hian Brazil an mikhual dawn a, playoff khel tur chuan an chak ngei ngei a ngaih bakah an chunga awm Venezuela an chetsual tel a ngai bawk, beiseina la nei mah se kawng a zau tawh lem lo.

World champion vawi nga ni tawh Brazil hi tling chiang tawh an ni a, coach thar Carlo Ancelotti enkawlna hnuai indinthar mek niin team nghet tak neih an tum avangin an inthlahdah ngawtin a rinawm loh.

Argentina pawhin qualifying match hnuhnung ber hi an khel dawn a, world champion hian Ecuador an lenchilh ang - Argentina tan hian captain Lionel Messi a inlan dawn lo, an rama an inkhelh zawh khan an match hnuhnung ber a khelh loh tur thu hi a tichiang nghal a ni.