Netherlands tana goal khung tam ber Depay

Memphis Depay chu Netherlands tana goal khung hnem ber a ni ta - Pathianni zan khan World Cup qualifier-ah goal hnih a khung a, Lithuania lakah Dutch team chu 3-2 in hnehna a chanpui.

Depay hian minute 11-naah ram tana a goal 51-na khungin, Oranje tana goal khung hnem ber Robin van Persie (50 goals, 102 matches) a khum - minute 63-naah goal khat dangin a khum leh bawk.

Brazilian club Corinthians tana khel mek Depay hian ram tan match 104 khelin goal 52 a khung tling ta a, Quinten Timber chuan Netherlands goal khat dang a khung ve bawk.

Netherlands hian match li an khelh tawhah tlawm an la nei lo a, vawi thum chakin, vawi khat an draw a, Poland nen point 10 ve ve neiin, an group-ah table chung ber an luah mek.

Mahse, Virgil van Dijk hoa tlarhnung lama ding Netherlands-in inenfiahna tur an nei a, FIFA ranking-a 143-na Lithuania-in goal hnih an lakah an khung thei - Serie A Torino club midfielder Gvidas Gineitis leh German third division club-a khel ṭhin Edvinas Girdvainis ten goal an khung tlat.

Lithuania hian si phurh an sut zo hman a, Depay-a'n chakna goal a khung hram - Lithuania hi Oranje laka goal khung thei ram zinga FIFA ranking-a hniam ber an ni.