Red Bull-in hma kan sawn - Verstappen

Italian Grand Prix an tlan zawh taka hnehna changtu Max Verstappen chuan Red Bull-in hma an sawn tih a sawi a, an tan champion tuma inelna a la tawp lo tih a sawi bawk.

Pathianni zan khan Autodromo Nazionale Monza-ah intlansiak hi neih niin, champion lai Verstappen a chak ber a, season kal laiah a vawi thum nan hnehna a chang - a hnungah hian Lando Norris leh Oscar Piastri te an thleng.

Dutch driver Verstappen hian championship hmahruaitu Piastri chu point 94 laiin a phak lo mek a, intlansiak hmabak pariat lai an la neih avangin engkim a la danglam thei a, inelna a la hmuhnawm chhunzawm dawn.

A zawna vawi li champion thei Verstappen chuan, "Tun ṭum kan intlansiak chuan chanchin ṭha tam tak a nei, kan rilru leh taksa in inelna hautak hmachhawn a cho tih kan lantir a, car kan nei ṭha tawk tih a takin kan hmu bawk.

"McLaren hi team ṭha an ni a, season duhawm tak an hmang ngei tih pawh kan hre chiang. Mahse, season a tawp hma chuan inelna hi a la zo lo a, keini chuan kan beidawn san ve dawn lo," tiin a sawi.

September 21, Pathianni tlai dar 4:30 hian Baku City Circuit-ah Azerbaijan Grand Prix an tlan leh ang.