Alex Marquez hun a thleng

Marc Marquez-a'n hun rei tak chhung hnehna a chan hnuah, a nau Alex Marquez chuan chak ni hmel a hmu ve leh ta. Pathianni zana tlan zawh tak Catalan Grand Prix-ah Alex hi a chak ber.

MotoGP season kal laiah Marc Marquez-a'n intlansiak 14 an hmachhawn zinga 10 laiah hnehna a chang thei a, Inrinni khan sprint race-ah a chak bawk, mahse intlansiak pangngaiah erawh Alex hun a thleng ve thung.

Rider championship hmahruaitu Marc hian pathumna aṭangin bul a ṭan a, mahse kawngkawi hmasaah Fabio Quartararo a tlan pel - inntlansiak a zawh meuh chuan pahnihna a ni a, an unau hnungah hian Enea Bastianini a thleng ve bawk.

Gresini Racing rider Alex chuan, "Ka tan chuan lawmna tur a tam, kei leh ka team hian hnehna chang turin intlansiak apiang hian theihtawp kan chhuah ṭhin," a ti, a u Marc pawhin a nau hi lawmpuina thu a sawi bawk.

World champion vawi ruk ni tawh Marc erawh umphak a harsa tawh dawn, point 182 tehmeuhin a sang fal tawh a, chesual thei chu la ni mah se midang tan umphak a harsa tawh ang.

Khawvela bike intlansiakna sang ber hi tun kar tawpah an tlan chhunzawm leh dawn. Misano World Circuit Marco Simoncelli tlankawngah San Marino Grand Prix an tlan dawn a ni.