Mizoram Police ngamtu Dinthar

GIG Motors MPL12-ah Dinthar FC leh Mizoram Police ten nimin khan football hmuhnawm an chhawp chhuak a, penalty vawi hnih hmutu Maimawms 3-1 in an chak. Laldampuia kaihhruai Dinthar hi pathumnaah an insawhnghet a, point 10 hmuin anmahni hnaih bertu Kanan FC aiin point liin an hmu tam zawk.

Dinthar tan MS Dawngliana, Lalrintluanga (Tutua) leh Jerry Lalchhanchhuaha ten goal an khung a, Police tan Lalfakzuala'n goal a khung bawk. Maimawms hian Zirtawpniah table mawngphaha awm SYS FC an hmachhawn dawn a, Police-in anmahni ang bawka point nga hmu Saikhamakawn FC an hmachhawn thung ang.

Boruak a dik

Nimin tlai boruak a nuam a, Police leh Dinthar ten an starting eleven an siksawi hret bawk. Police-in starting eleven-ah F. Lalrinpuia an rawn dah a, rawlthar Lalbiaktluanga dah chhuakin tawnhriat nei ṭha rualin bul an rawn. Valpuia, Lalfakzuala, Lalbiakhlua (Hlutea) leh Lalbiakhlua (Biaktea) te tlarhmaah an rawn awm a, midfield-ah R. Malsawmtluanga leh H. Lalbiakthanga te awm.

Dinthar FC-in hliam vangin player thar PC Rohlupuia an chhawr thei lo a, right back Lalsawmpuia chu defensive midfield-ah chhawrin Gilbert Lalbiaksanga a vawi khat nan bul a rawn ṭan a, Zemabawk tlangval hi right back-ah a rawn awm.

Dampuia'n bench-ah R. Laldanmawia leh Lalkhawpuimawia te a dah a, tlarhmaah Jerry Lalchhanchhuaha awmin Tutua leh Tea Chinzah ten an thlawp. Midfield-ah Sawmpuia bulah Dawngtea leh Lalhmingthanga Sailo (Tetea Sailo) te an awm a; midfielder Sangidngliana, Michael K. Lalhriatpuia eh Melvin Zomuana te bench-ah an awm thung.

Goal khat ve ve

Dinthar leh Police ten game class tak an pho chhuak a, inkhel a nung ṭha a, a hmuhnawm tel bawk. Police striker Valpuia'n chance ṭha bik a hlah a, goalkeeper Joel B. Lalramchhana paltlang mah se goal ruakah a ke chhe lamin (dinglam) a khung lo.

Dinthar pawhin chance ṭha an insiam tho a, Tea Chinzahin a hun ṭha neih a hmang ṭangkai lo. Farkawn tlangval Tea Chinzah hian penalty Lalhmunmawia (Ahmuntea) lakah a hlawh chhuak a, minute 32-naah Dawngtea'n Dinthar tan a khung.

Inkhel ṭantirh lamah an inhnehtawk viau a, goal luh hnuah Dinthar an khel ṭha zawk. Mahse, injury time-ah Police captain Fakzuala'n chance ṭha neiin ṭha taka a khalh luh hnuah goal ṭha bik a khung.

Dinthar an ṭha zawk

Second half-ah Dinthar an chungnung hret a, throw in an hmang ṭangkai bawk. Ball boy 'ball' a pe rang a, Dintharin throw in hmang ṭangkaiin Police tlarhnung pawp lai an hmu fuh a, Tea Chinzah cross chu Tutua'n minute 55-naah a khung.

Police-in freekick aṭanga siphurh sutna remchang an nei a, MS-a'n a pet ṭha tawk lo. Dinthar an vannei zui a, ball-in Police defender Ahmuntea kut a per avangin penalty an hmu a, minute 61-naah Jerry-a'n goal-ah a chantir.

Police-in tlawm an duh lo a, risk lain Malsawmfela rawn luhtirin goal chance pawh a rawn siam. Mahse, Police-in goal an khung thei lo a, Valpuia freekick ṭha zet chu Dinthar keeper Ramchhana'n ṭha takin a dang. Hlutea pawhin six yard box aṭangin a hlah a, Sawmfela ball pek Fakzuala'n khung thei lo.

Dintharin goal chance an ngah zawk a, Tea Chinzah leh Tutu ten goal dang an khung thei lo. Bench aṭanga rawn lut Lalkhawpuimawia pawhin goal khung theihna remchang a nei a, goal ban a pet per. Goal dang a luh belh tawh lo a, chak phu zawk Dinthar 3-1 in an chak.