Manchester Derby-ah Bayindir nge Lammens?

Manchester Derby chu September 14, Pathianni zan dar 9:00 hian khelh a ni dawn a, Manchester United leh Manchester City te dinhmun hniam lai tak ni mah se Premier League-a an record ropui tak avang ringawt pawhin inkhel hian ngaihven a hlawh ang.

Club pahnih hi goalkeeper-ah an buai ve ve a, Man City lam erawh an hawi lam tur a chiang ṭan. Brazilian goalkeeper Ederson-a'n Fernerbahce a pan a, nipui bazarah James Trafford la lut mah se transfer tawp niah Italy no. 1 Gianluigi Donnarumma an la lut. Italy goalkeeper Donnarumma hian bul a ṭan nghal mai a rinawm a, mah se PSG goalkeeper hlui hian Italy-in Israel an hneh ṭumin goal li ngawt a chhuah.

Manchester United lamin sason liam taa an number 1 goalkeeper Andre Onana chu loan hmangin Trabzonspor-ah an kaltir dawn a, Cameroonian keeper an chhawr tak loah chuan Altay Bayindir emaw Senne Lammens emaw an inlan a ṭul dawn tihna a ni. Tun season Premier League match thum khelh tawhah Bayindir a la inlan vek a, Turkey tan pawh koh ni mah se match hnih a khelhah bench-ah a ṭhu ve ve.

Lammens erawh Belgium tana koh a ni lo a, ram tana koh loh player dangte nen training a nei thei tawh thung. Bayindir hian khelhna hun a neihah mit a tlung tawk lo a, hei vang hian Lammens hi Manchester Derby-a bul ṭan nghal tura ngaih a ni.

Man United defender hlui Phil Jones chuan, "United-a number one ni tur chuan samak (rhino) anga vun chhah a ngai. Goalkeeper tihsual hi a pawi em em a, vawi khat an chetsual chuan tlarhnung a nghing nghal. Chuvangin tuang an tihchhah hi a ṭul hle," tiin a sawi.

Jones-a'n Man United tana a khelh chhungin goalkeeper pasarih Ben Amos, Anders Lindegaard, David de Gea, Victor Valdes, Sergio Romero, Joel Pereira leh Dean Henderson te nen an khel ho hman a, Man United-a goalkeeper mawhphurhna a hrechiang khawp ang.