Turkey-a pem tur United keeper Onana

Manchester United goalkeeper Andre Onana chuan season khat chhung loan-a khel turin Turkish club Trabzonspor a zawm dawn a, he thuziak i chhiar meuh chuan a zawm fel tawh hial mai thei.

Premier League-ah transfer bazar khar ni tawh mah se, player erawh an la chhuak thei reng a, Turkish football hian Zirtawpni thleng nipui transfer an la hawng dawn bawk.

Onana hi Turkish club tho Galatasaray nen sawizawm an ni hman a, mahse, tun nipuia sum hmang hnem tak club hian tuna Onana dawrtu Trabzonspor goalkeeper Uğurcan Cakır an la lut ta zawk.

Ugurcan Cakir man hi euro maktaduai 36 thlenga sang chho thei tur a ni a, a tam tham hle. Hetiang a nih avang hian Galatasaray-in Onana an hawisan a, an keeper an chhuhsak Trabzonspor hian Cameroon keeper hi an la lut ve leh ta zawk dawn a ni.

Manchester United hian nipui transfer tawp ni khan Royal Antwerp aṭangin keeper Senne Lammens an la lut a, hei vang hian Onana emaw Altay Bayindir chu an chhuah mai a rinawm sa.

United hian keeper tawnhriat nei ṭha Tom Heaton an la kawl cheu bawk a, United thuneitu sang lamin senior keeper pali neih pawi ti lo mah se, head coach Ruben Amorim chuan European football an khelh dawn loh avangin player tlem zawk enkawl a duh niin an sawi.

Ajax leh Inter Milan-a hming chhertu Onana hi season hmasa kha chuan United tan first choice keeper a la ni a, mahse, pre-season training-ah malpui hliam neiin, season thar atana United inbuatsaihna inkhelah a inlan lo vek.

Premier League match thum an khelh tawhah Bayindir tluk loin, bench a luahlum zui a, League Cup-a League Two club Grimsby Town an hmachhawn ṭumin bul ṭan mah se, mualpho takin an tlawm zui.

Kum 29 mi keeper hian kum 2023 khan Inter Milan chhuahsanin, £47.2mtd-in United a zawm a, Ajax-a a boss hlui Erik ten Hag-a team enkawl a zawm. Mahse, United-a a cham chhung zawngin tihsual vangin a mualpho fo a, beisei a phak lo.

United fans tam tak chuan Spanish keeper ṭha David de Gea pet chhuak a, a aia Onana thlan a ni chu tun thlengin mak an la ti a, Cameroon international hi loan-a chhuak tur ni mah se, United-a a kir leh hi a rinawm tawh lo zawk.