France lakah PSG an lawm lo

Season hmasa treble champion Paris St-Germain chu international break-a an player pahnih, France international Ousmane Dembele leh Desire Doue inhliam avangin France national team chungah an lawm lo a, player pahnih inhliam chu thil pumpelh theih niah an ngai.

France hian Zirtawpni zan khan World Cup qualifier-ah Ukraine chu 2-0 in an hneh a, he inkhelah hian PSG player pahnih, Dembele leh Doue te hi an inhliam a, treble champion PSG an lawm lo hle.

Luis Enrique-a enkawl team chuan thuchhuah siamin, "French national team-ten training an neih ṭan hma aṭang tawh khan, an dinhmun dik tak ziakin kan thawn a, an hah lutuk tur leh an tan inhliamna chance a san theih dan thlengin kan ziak," an ti.

PSG chuan, "Heng medical recommendation kan neihte federation-in a ngai pawimawh lo a, French national team medical staff-ten an ngaihtuah lo hi pawi kan ti hle," an ti a, thil thleng duhawm lo chuan club leh ram inkarah nakin zel atan thawhhona ṭha zawk a siam an beisei thu an sawi.

Zirtawpni zana France inkhelah hian Doue hi hliam vangin lakchhuah a ni a, amah thlaktu Dembele chu minute 81-naah hliam vang bawkin lakchhuah a ni leh a ni.

France boss Didier Deschamps erawhin PSG puhna chu phain, "Dembele kha a inkhel tlak tih ka chiang a, chutiang ni lo se, ka inkhelhtir bik lo ang. A in fit a, mahse, vanduaithlak takin a inhliam ta a ni," a ti a, hliam chu eng player chungah pawh thleng thei a nih thu a sawi.

Deschamps chuan Doue chu inkhelh a duh avanga khelhtir a nih thu a sawi bawk a, "Khelmual an luh chuan inhliam thei vek an ni," a ti a, an vanduai palh maia a ngaih thu a sawi.

Ballon d'Or dawng thei dinhmuna ding mek Dembele hi kar ruk vel a inlan thei dawn lo nia sawi a ni a, Doue hi kar li a chawl dawn thung - player pahnih hian league bakah Champions League match hmasa lam an khel thei dawn lo a, an hmachhawn theih loh tur zingah Atalanta leh Barcelona an tel.