Asia Cup: Zaninah India-in UAE hmachhawn dawn

Asia khawmualpuia cricket khel ramte T20 hmanga inelna Asia Cup chu nizan khan khelh ṭan a ni a, zanin dar 8:00 hian champion rinkai India leh inelna thlengtu United Arab Emirates te an inhmachhawn ang. Men in Blue tan match hmasa berah harsa tur awmin a lang lo a, mah se September 14, Pathianni zan dar 8:00-a Pakistan nen an inkhelh hun atana inpuahchahna pawimawh a ni dawn.

Record nei ṭha

Asia Cup hi kum 1984 aṭanga khelh ṭan kha a ni a, ODI inelna hmanga ṭan niin tunah chuan T20 nen an inneih chhawk. India hi champion hmasa ber an ni a, kum 2016-a T20 hmanga inelna ṭan a nih pawh khan champion hmasa ber an ni leh bawk.

Men in Blue hi Asia Cup-ah vawi riat champion tawhin champion ngun ber an ni a, inelna hnuhnung berah pawh an champion. Chutihrualin inelna hnuhnung ber ODI a ni a, T20 hmanga inelna neih hnuhnun ber a nih chuan Sri Lanka an champion thung.

Kum 2022-a Sri Lanka champion ṭum hian inelna hi tun ṭuma neihna United Arab Emirates-ah khelh a ni a, India hian Super Four-ah Sri Lanka leh Pakistan hneh loin final an thleng zo lo.

Inelna kalhmang

Tun ṭum inelnaah hian team pariat an tel a, group A-ah India, Oman, Pakistan leh a thlengtu United Arab Emirates te awmin group B-ah Afghanistan, Bangladesh, Hong Kong leh Sri Lanka te an awm bawk.

Vawi khat ṭheuh an inkhel kual ang a, group khat aṭangin team pahnihin Super Four an lut ang. Super four-ah hian team palite hi vawi khat ṭheuh an inkhel kual leh ang a, a sang pahnihin final an khel dawn.

Cricket ngainatute nghahhlelh India leh Pakistan chu group stage-ah a thleng nghal dawn a, inelna kalphung thlir chuan super four leh final-ah ram inhal pahnih hi inhmachhawn leh thei an ni.

Lawmman

Asia Cup lawmman hi official taka puanzar la ni lo mah se a lan dan chuan a tlem chhe dawn lo. Champion team hian cheng nuai 260 an dawng ang a, pahnihnain cheng nuai 130 an dawng dawn.

Player of the series lawman a awm dawn a, cheng nuai 12.5 a dawng dawn. Asia Cup lawmman hi India rama football inelna thlir chuan tam thawkhat viau mah se a khel tur India cricketer tan chuan itawm tham a ni kher lo ang.

India all rounder Hardik Pandya chu training-naah sana vang zet mai Richard Mille RM 27-04 a bum hmuh a ni a, Rafael Nadal pual bika siam sana design hi khawvelah 50 chauh awmin, pakhat man pawh hi nuai 2,000 man a ni. Hardik Pandya hian Asia Cup pakhatna lawmman let riat vel man hu sana a bun tihna a ni a, Indian cricketer-te sum lakluh tamzia a hriat theih.