Levy thutlukna kha a mak - Kane

Harry Kane chuan Tottenham Hotspur-a a nihna aṭanga Daniel Levy a bang mai chu mak a ti hle a, bang mah se club hmasawn nana a hnathawh zawng zawngte chu sawi nep theih a ni lo tih a sawi bawk.

Levy hian kum 25 chhung Spurs a enkawl a, Executive Chairman a nihnna anga a kaihhruaina hnuaiah hmasawn viau mah se champion an harsat. Season hmasa khan Europa League nomawi an la, mahse fans lamin an ngainat zual phah lem lo a, bang tura nawrna thawm a ri reng tho.

Tottenham striker hlui, tun hma lama Levy nena lo thawkdun reng tawh Kane chuan, "Hetiang thil hi a thlen mai pawh ka ring lo a, min barakhaih takzet a ni. Daniel hi Tottenham Chairman ṭha tak a ni a, mawhphurhna sang ber hi kum 20 a chelh tling.

"Tun hma lama Spurs dinhmun leh tuna an thlen chin hi chhut ila, hmasawnna kawng hrang hrangin a awm. Khelmual chhungah chauh a ni lo a, sumdawnna leh khelmual pawn lamah pawh club lian dangte huangah a hruai thleng a ni.

"Thutlukna siam a ni tawh a, tunah chuan Spurs hian bung thar a kai ngei dawn. Thil ṭha leh ṭha lo thleng thei a awm, chutiang karah chuan club thuneitu lamin a ṭha zawnga an kaihhruai ngei pawh ka beisei," tiin a sawi.

Manager thar Thomas Frank enkawlna hnuaiah Spurs hian Premier League season bul an ṭan chho mek a, an match hmasa pathumah vawi hnih chakin point ruk an hmu - palina niin Liverpool, Chelsea leh Arsenal hnuaiah an awm mek.

North London club hian Inrinni zan dar 10:00 hian West Ham an lenchilh ang.