MLS match pathum khel thei lo tur Suarez

Hrem vangin Luis Suarez chuan Major League Soccer (MLS) match pathum a khel thei dawn lo, a hmachhawn theih loh tur zingah hian Leagues Cup final-a an hneh loh Seattle Sounders pawh an tel.

Inter Miami leh Seattle Sounders te inkhelh banah buaina a chhuak a, chak lo zawk Miami striker Suarez hian an khingpui coaching staff ṭhenkhat chu chil a chhak khum a, a hnuah inchhirin ngaihdam dil mah se hremna erawh a hmachhawn a ngai tho.

Leagues Cup Organizing Committee chuan a tirah Suarez hi match ruk chhung khel thei lo turin an hrem tih an sawi tawh bawk a, hemi an hremna hi MLS-ah hian chhiar tel a ni ang; Leagues Cup match dang pawh a khel thei dawn lo tihna a ni.

Kum 38 mi Suarez hian a vanglaiin Liverpool leh Barcelona tan pawh a lo khel tawh a, nungchang mawi lo vanga hrem pawh a lo tawk zauh zauh tawh, a kum tam hnuah pawh a ze ngai a la kalsan thei tak tak lo.