Kanan FC nge MLS-in dinhmun siam ṭha dawn?

GIG Motors I Day Football-ah vawiin tlai dar 3:00 hian Kanan FC leh MLS FC te an inkhel dawn. Inkhel hi Zonet Rihnim, Empai leh YouTube (Member tan) ah a en theih ang.

Chawngthansanga kaihhruai Kanan FC-in match hnuhnung pahnihah I League club Chanmari FC leh Aizawl FC an hneh loh ve ve avangin point ruk bak an la hmu lo a, table-ah erawh palinaah an awm chho char char.

MPL-ah palina chinin semifinal an khel dawn a, Kanan hi semifinal khel thei chinah la awm mah se vawiina point an hmuh belh loh chuan round 6 zawhah chuan table chanve hnuai lamah an awm tawh ang.

MPL kai thar Kanan hian champion thei tur squad an din a, amaherawhchu an elpui Dinthar an hneh loh hnuah I League club pahnih an hneh loh avangin champion tur khawp chuan an la huaisen rih lo. Mahse, Kanan hian semifinal khelh beiseina erawh an la nei sang a, chumi tur chuan MLS hi an hneh a pawimawh.

MPL history-ah Aizawl khaw pawn club-in semifinal an la khel lo a, Lunglei FC leh Project Veng FC te season khatnaah an la relegate ve ve thung. Tun season aṭanga rawn tel Lawngtlai club MLS tan pawh inhamtang a harsa dawn a, MPL khelh zel an tum a nih chuan vawiina Kanan laka point an hmuh hi a pawimawh ang.

MPL4-a Mizoram Police an relegate khan point 12 an hmu a, table mawngphaha awm zingah point an hmu sang ber. MLS hian point thum an hmu tawh a, Kanan laka point hmuh belh turin tlarhnunga awm F. Lalchhanchhuaha leh Lalbiakzuala te an ding khawng lehzual a ṭul dawn a ni.