Nomawi chawi ṭhin coach kan la lut - Forest neitu

Nottingham Forest neitu Evangelos Marinakis chuan coach Nuno Espirito Santo ban a, Tottenham Hotspur coach hlui Ange Postecoglou an lakluh hnuah, "Nomawi chawi ṭhin coach kan la lut a ni," a ti.

Marinakis, "Kan club hian nomawi chawi ṭhin coach kan la lut a, level sang bera a tawnhriat ropui tak te, Forest puih duhna thinlung a neihte hian kan club enkawl hi a inhmeh tih a pholang a ni," a ti a, Spurs ban hnu hi lungsi takin City ground-ah a lo lawm.

Kum 60 mi Postecoglou hian European top flight league-ah tawnhriat a nei tam lem lo a, Spurs a enkawl hmaa club langsar a enkawl chu Celtic a ni - Scotland-ah hian a hlawhtling hle thung.

Celtic hi season hnih a enkawl chhungin Scottish Premiership (2), Scottish Cup (1) leh Scottish League Cup (2) a lakpui. A League lamah Brisbane Roar chu league nomawi vawi thum a lakpui a, Japanese club Yokohama F. Marinos pawh J1 League-ah a champion pui.

Kum 2015 khan Australia chu Asian Cup a lakpui a, season hmasa khan Europa League-ah Spurs a champion pui bawk - nomawi a kawl hnem tawh hle. Mahse, Greece-a piang, Australia-a seilian coach hian season hman zawh takah Spurs tan nomawi chawi mah se, league-ah 17-na a nihpui hram a, an ban phah.

Mahse, thla thum chiah a awl hman tihin Forest-in Nuno an ban a, a hmun ruak a luah dawn ta. Marinakis chuan, "Premier League kan inpetkai leh hnuah, theihtawp chhuahin, European football khelh tumin kan inbuatsaih a, tunah chuan club ṭha ber berte el a, nomawi chawi tum tura kan inbuatsaih a ngai a ni.

"Ange hian chu kan beisei ang titur chuan record leh theihna a nei a, kan hmachhawp phurawm tak min ṭawmpui tura kan zinga a lo tel tur hian min tiphur hle a ni," a ti a, nomawi chawi ṭhin coach an lakluh chhan chu champion an duh vang a nih thu a sawi - pressure a nep lo ang!

Nottingham Forest hian tun season-ah league match thum khel tawhin, Brentford (3-1) an hneh hnuah Crystal Palace chu 1-1 a inhnehtawkpuiin, an league match hnuhnung berah, rin loh takin team talbuai West Ham chu 3-0 in an ngam lo.

Mahni muala Hammers an ngam loh hi Nuno tan Forest a enkawl hnuhnung ber a ni nghal a, September 13, Inrinni zanah Arsenal an lenchilh zui dawn - Postecoglou tan a hna hmasa ber tur a ni dawn a, hnehna a chan nghal theih chuan Forest fan-ten Nuno ngai loin hma hun an thlir thei ang.