Panganaah Anisimove

Hmeichhe tennis thuneitu sang - Women's Tennis Association (WTA) chuan world ranking thar an ti chhuak a, tun hnaia khel ṭha ṭhin Amanda Anisimova chuan nasa taka hmasawnin pangana dinhmun a luah.

Wimbledon leh US Open final a lut a, chak lo zawkah ṭang ve ve mah se Anisimova hian a ranking a siamṭha, a hma a player panga nghawt kal kanin a thiam zual panga zingah a inhlangkai.

Anisimova hian Wimbledon final-ah Iga Swiatek a hneh lo, a hneh loh Polish star hi tunah world number 2 a ni mek. US Open an khelh zawh takah khan final-ah Aryna Sabalenka a hneh lo thung, ani hi ranking sang ber a ni mek.

Season hmasa US Open finalist Jessica Pegula erawh palina aṭangin pasarihnaah a tlhniam thung a, tun season atan Grand Slam khelh tur awm tawh lo mah se, inelna lian lo zawk khelh hmabak an la nei nual a, ranking siamṭhatna hman a la awm.

November 1-8 chhungin Riyadh, Saudi Arabia-ah WTA Finals an la khel dawn a, a thiam zual pariat inelna hmachhawn tur pawh a la chiang lo, a hmain inelna dang an la nei nual dawn a ni.