Liverpool player ka ni thei ka lawm - Isak

British transfer record fee-a Liverpool zawmtu Alexander Isak chuan Premier League champion club a zawm thei chu a lawm thu a sawi chhuak a, media-a thuthang zawng zawng a dik vek loh thu a sawi bawk.

Isak chuan, "Thil thlen dan hi mi zawng zawngin kan hre lo a, mahse, tuna sawifiah kher pawh ka tum chuang lo. Miin an sawi emaw, an ziah emaw ka va thunun vek thei lo a, mahse, Liverpool player ka ni thei erawh ka lawm takzet," a ti.

Kum 25 mi Isak hian tun season-ah club football a la khel lo. Liverpool pan a duh avangin khatihlaia a club Newcastle United nen an inhmu thiam lo a, club training pawh a zawm duh lo.

Sweden international hian amahin training a nei a, tun international break-ah match a khel ve leh chiah. Thawhṭanni zan khan World Cup qualifier-ah Kosovo an hmachhawn a, minute 18-a la awma luhtir niin, 2-0 in an tlawm.

Isak chuan, "Eng pawh ni se, international break hmaa engkim kan chinfel vek hman kha a lawmawm ka ti a, football lamah rilru ka pek leh vat theih phah a ni.

"Ka tan chuan thil thleng zawng zawng kha tawnhriat thar vek a ni a, mahse, khelmual pawn lamah pawh rilru ka tipaukhauh hram hram a ni," a ti a, a transfer boruak a tawp thei ta chu a lawm hle.

Isak hian pound maktaduai 125-in Liverpool hi a zawm a, British football-a player man to ber a ni. Reds hian September 14, Pathianni zanah Burnley an hmachhawn dawn a, Isak tan khelmual lut nghal turin a la hma deuh a rinawm.

Sweden manager Jon Dahl Tomasson chuan, "Team zingah training session pawh vawi thum chiah a la nei rih a ni," a ti a, Isak chu inkhel nghal tura a la inpeih loh thu a sawi.