Serbia sawptu England tan World Cup a hnai

Thomas Tuchel-a enkawl England chuan an mikhualna ramah Serbia chu 5-0 in an sawp a, football inelna ngaihhlut ber FIFA World Cup 2026 khel turin an dinhmun a ṭha ta hle.

Three Lions tan hian player pang - Harry Kane, Noni Madueke, Ezri Konsa, Marc Guehi leh Marcus Rashford ten goal khat ṭheuh an khung a, mual neitu lamin a chhanletna tur an nei lo.

Serbia tan an captain, Nottingham Forest defender Nikola Milenkovic chu minute 72-naah hnawh chhuah a ni a, an kim loh hnuah goal hnih an chhuah, kim pawh ni se an tan Tuchel-a leh a naute lakah thawh chhuah beiseina a awm lo tluk a ni.

An match hnuhnung zawkah England hian Andorra chu 2-0 in an hneh a, chak mah se inkhel entu lam an lungawi lo, an duh leh beisei angin an khel hmuhnawm lo, tunah erawh fans lam hmuh duh ang ngeiin an khel chhuak.

Three Lions manager Tuchel chuan, "Ka sawi tawh ang khan player duh thlan tur kan ngah tawk a, eng tiangin nge kan khelh chhuah tih chu ka mawhphurhna a ni. Ka naute hian coach ṭha lehzual zawk ni turin nitin hian chona min pe zawk," a ti.

Group K-ah England hian vawi nga khel tawhin an khingpui an la hneh vek a, anmahni hnaih bertu Albania aiin point sarih ngawtin an sang fal zawk - thil mak tak a thleng a nih nghawt loh chuan World Cup an khel ang.

5 Star Haaland

Erling Haaland chuan goal khung mi a nihna a lantir chhunzawm - Manchester City striker hi an ram Norway tan pawh a hrang chhunzawm a, an khingpui Moldova lakah goal nga ngawt khungin 11-i in an chak.

Thawhlehni zan World Cup qualifying inkhelah, striker ṭha Haaland bakah hian substitute Thelo Aasgaard chuan goal li a khung a, kum 1998 hnua a vawi khat nan Norway hian World Cup khelh an beisei mek a ni.

Kum 25 mi Haaland hian Norway tan match pakhata goal nga a khung vawi khatna a ni a, a club Man City tan erawh tun hmain vawi hnih a lo ti tawh thung a, tun ṭumah hian goal a khung tam bakah a ṭhiante khung tur vawi hnih a siamsak bawk.

Group I-ah Norway hian hma an hruai mek, match nga an khelh tawh chinah la chak vekin point 15 an hmu, anmahni hnaih bertu Italy chuan point kua an hmu a, Azzurri hian match khatin an khel tlem thung.

Group pakhatah hian ram panga an awm a, vawi hnih ṭheuh an inkhelh kual hnuah a sang ber chu World Cup khel turin an tling nghal dawn, pahnihna chuan playoff an khelh a ngai dawn - Norway hian kawng dik an zawh mek a ni.

Ronaldo leh Mbappe

Portugal tan Cristiano Ronaldo chuan goal a la khung chhunzawm zel, penalty khungin an ram hi Hungary lakah 3-2 in hnehna a chan pui. Ronaldo hian World Cup qualifying-ah goal 39 a khung tawh, goal khung tam ber Guatemala player Carlos Ruiz a nihrual ta chiah.

Kum 40 mi Ronaldo hian ram tan match 223 a khelh aṭangin goal 141 a khungsak tawh a, a kum tam deuh tawh mah se tuna a lan dan chuan World Cup 2026 pawh hi a la khelh theih mai a rinawm, hei erawh dawhthei taka nghah ngai a la ni thung.

Inkhel dangah France tan captain Kylian Mbappe a inlar bawk - Real Madrid forward hian Iceland lakah an si phurh sut nan penalty a khung a, secnd half-ah Bradley Barcola chuan Les Bleus 2-1 a an chakna goal a khung bawk.