Ten Hag thlaktu tur Hjulmand

Bayer Leverkusen chuan Bundesliga match hnih lek team a kaihhruai hnua an ban tak Erik ten Hag thlak turin Kasper Hjulmand an la lut a, kum 2027 nipui thleng enkawl turin German club-ah hian contract a ziak.

Hjulmand chuan, "Leverkusen angin team enkawl tura min ring hi ka tan chuan chawimawina a ni a, player tawnhriat nei ṭha leh hmabak nei êng tak takte nen he club tana hna kan thawk ho thei tur hian min tiphur a ni," a ti.

Kum 53 mi Hjulmand hi German football-ah a mikhual hran lo a, May 2014- - February 2015 inkar khan Mainz 05 a lo enkawl tawh. Mahse, match 24-a kaihhruaiah vawi nga chiah a chak a, Leverkusen-ah chuan result ṭha zawk neih a tum ang.

Danish coach Hjulmand hian an ram club Nordsjælland leh Lyngby Boldklub te lo enkawl tawhin, Nordsjælland hi 2011-12 season khan Danish Superliga-ah a champion pui - tun thlenga a nomawi chawi tawh awmchhun a ni.

Mahse, Hjulmand-a hming chherna tak erawh an ram national team, Denmark a enkawl chu a ni a, match 54-a kaihhruaiah vawi 32 hnehna chanpuiin, vawi riat draw an nei a, vawi 14 chiah tlawmin, a win percentage hi 59.26% a tling pha.

UEFA Euro 2020-ah khan Denmark hi semifinal luhpuiin, England lakah 2-1 in an vanduai. Mahse, World Cup 2022 a hruai thleng chungin, group stage-ah an tla a, Euro 2024-ah last 16 lut mah se, Germany ngam loin an tla zui.

July 2024 khan Denmark coach a nihna aṭangin a bang a, team enkawl a neih loh vang vang hnuah Leverkusen a zawm ta - Xabi Alonso kalsan tak team a enkawl dawn avangin hmabak a hautak dawn a, Ten Hag ban dan avangin an chanchinin ngaihven a hlawh bawk ang.

Alonso-a'n 2023-24 season khan rin loh takin, Leverkusen hi league leh DFB-Pokal nomawi a chawipui a, season khat dang a enkawl leh hnuah, nipuiah khan Real Madrid a zawm.

German club hian Manchester United ban hnu Erik ten Hag an la lut zui a, mahse, an beisei ang a ni lo a, league match hnih hnuah an ban. Leverkusen sporting director Simon Rolfes chuan, "Ten Hag kan la lut kha kan tihsual a ni a, kan chhunzawm tir chuan kan tisual nasa lehzual dawn tihna a ni," a ti a, Dutch coach an ban chhan a sawi.

September 12, Inrinni zanah Leverkusen hian Eintracht Frankfurt chu league match khel turin an mikhual dawn a, Hjulmand hnuaia an match hmasa ber tur a ni ang.