ISL club-ten sumdawng hausa thawhpui an duh

December-ah Indian Super League khelh a ni dawn tih a chiang tawh a, October-ah season ṭan nan Super Cup khelh a ni dawn bawk - hetiang boruak karah hian ISL club-ten thawm an nei leh ta a, AIFF chu ISL kalpui zel tura thawhpui tur a thlannaah company rintlak tak thlang se an duh thu an thlen.

AIFF hian Football Sports Development Limited (FSDL) nena thawk dunin, ISL an kalpui ṭhin a, mahse, December 2025-ah an thawh dunna a tawp tawh dawn. Pawl pahnih an inrem lawk thei lo a, an inrem theih loh karah Supreme Court lo inrawlhin, AIFF Constitution duan thar pawm a nih hma chu inbiakna kalpui lo turin a ti.

Mahse, ISL club-te ngenna angin AIFF-in Supreme Court a dawr a, SC hian AIFF leh FSDL chu indawr phalna pein, an ruahmannate an hnena thlen leh turin an hriattir.

AIFF leh FSDL hian ISL lo awm tur atan, commercial partner tur zawng turin thu an titlu a, FSDL chu inphah hniamin AIFF tan kawng a hawnsak.

Indian football-a thuneitu sang ber AIFF hian September 15, Thawhṭanniah tender a chhuah dawn a, sumdawnna lama thawhpui tur a zawng ang. October 15, Nilainiah commercial partner thar puan hman tum a ni.

ISL club-te chuan, "AIFF thuchhuahah lawmthu kan sawi a, Supreme Court thupek anga ISL commercial rights atana tender chhuah tura rang taka inhmalaknaah pawh lawmthu kan sawi e.

"AIFF hian rei tak chhung thawhpui theih tur commercial partner a thlan chhuah ngei kan beisei a ni. Chu chuan club-te kan kal zelna turah min pui ang a, tuna harsatna kan tawh mek ang hi kan pumpelh nan chu chu a pawimawh em em bawk a ni," an ti.

ISL club-te hian AIFF hian rei lotê atan chauh commercial rights chungchanga thawhpui tur hi a thlang ang tih an hlau a ni ber a, hmanni lawka hma hun chiang loa an awm reng anga awm nawn an duh tawh lo.

Indian top flight league club-te chuan, "AIFF, Tender Committee leh Oversight Committee ten kan hma hun ngaihtuah tak chungin thutlukna an siam ang tih chu hre reng mah ila, thawhpui tur in thlan hunah, sum lama talbuai lo, ding nghet tak, tun hmaa buaina la nei ngai lo thlan ni se kan duh a ni.

"Chu mai a ni lo - football leh infiamnaa sulhnu lo nei tawhte chu duhsak ṭha kan ti a, kan commercial partner thlan tur hian Indian football hma hun chu thui takin a hril dawn a ni," a ti.

AIFF-in commercial partner thar a thawhpui turah hian Bid Evaluation Committee din niin, Supreme Court ruat angin justice L. Nageswara Rao chu hotupa a ni a, Asian Football Confederation aṭangin Kesavaran Murugasu leh AIFF president Kalyan Chaubey te an tel.

Hetihlai hian AIFF hnuaia MRA Task Force chu Tender Committee anga awmin, anni hian professional services firm-in commercial partner tura ṭha an tih, an thlan chhuahte chu an lo thlifim leh ang a, Bid Evaluation Committee-in an lo en ve leh dawn a ni.

ISL club-te hian AIFF-in Super Cup buatsaih an tum chu an thlawp thu an sawi bawk a, hei hi AIFF tan chuan thawk huaina tham tur a ni dawn. Indian football thuneitu sang hian Super Cup hi season ṭan nana khelh tur a nih thu an lo sawi tawh a, mahse, khatihlai kha ISL hma hun chian loh lai a nih avangin ISL club-ten an bengkhawn lo.

Tunah erawh ISL khelh chhunzawm a ni ngei dawn tih a chian avangin ISL club-ten khelh an hreh lo a, October 25 - November 22 inkara khelh tur a ni - a kar lakah international break a awm dawn a, tun hma anga khelh zung zung kha a theih dawn lo thung a ni.

Season hmasa ISL-ah khan club 13 an awm a, Bengaluru, Chennaiyin, East Bengal, FC Goa, Hyderabad FC, Jamshedpur FC, Kerala Blasters, Mohammedan SC, Mohun Bagan SG, Mumbai City, NorthEast United, Odisha FC leh Punjab FC te an ni a, season tharah erawh 14 an ni tawh dawn.

I League champion Inter Kashi chuan season thar aṭangin ISL an khel tawh dawn a, anni hma hian Punjab FC leh Mohammedan SC chu I League champion nih vangin ISL-ah hian an lo inpet kai tawh - relegation a la awm lo thung.